غزہ پر اسرائیلی حملے جاری، مزید 18 فلسطینی شہید

امریکی صدر ڈونلڈ ٹرمپ کی جانب سے غزہ میں امن منصوبے پر پیش رفت کے اعلان کے باوجود اسرائیلی فوج کی کارروائیاں بدستور جاری ہیں۔ تازہ فضائی حملوں میں بچوں سمیت مزید 18 فلسطینی جان کی بازی ہار گئے، جبکہ متعدد افراد زخمی ہونے کی اطلاعات بھی سامنے آئی ہیں۔

فلسطینی ذرائع کے مطابق اسرائیلی حملوں میں غزہ سٹی، خان یونس، دیر البلح اور جبالیہ کے مختلف علاقوں کو نشانہ بنایا گیا، جہاں رہائشی مکانات پر بمباری کی گئی۔ حملوں کے باعث کئی عمارتیں تباہ ہو گئیں اور امدادی کارروائیاں جاری ہیں۔

ادھر امدادی ٹیموں نے 136 گھنٹے تک جاری رہنے والے سرچ آپریشن کے بعد ملبے سے ایک ہی خاندان کے 112 افراد کی لاشیں برآمد کر لیں۔ حکام کے مطابق حالیہ تین روز کے دوران شہید ہونے والے فلسطینیوں کی تعداد 28 تک پہنچ چکی ہے، جن میں خواتین اور بچے بھی شامل ہیں۔

دوسری جانب جنوبی لبنان میں بھی اسرائیلی حملوں کا سلسلہ جاری رہا، جہاں حملوں کے نتیجے میں پانچ لبنانی فوجی زخمی ہوئے۔ واقعے کے بعد سرحدی علاقوں میں کشیدگی برقرار ہے۔

غزہ کی وزارت صحت نے طبی مراکز، اسپتالوں اور ادویات کے گوداموں کو نشانہ بنائے جانے کی شدید مذمت کرتے ہوئے ایسے حملوں کو بین الاقوامی انسانی قوانین کی خلاف ورزی اور جنگی جرم قرار دیا ہے۔

دوسری جانب خطے میں جاری کشیدگی کے باعث عالمی برادری کی جانب سے جنگ بندی، شہریوں کے تحفظ اور انسانی امداد کی بلا رکاوٹ فراہمی کے مطالبات ایک بار پھر زور پکڑ رہے ہیں۔