امریکی سرپرستی میں لبنان اور اسرائیل کے درمیان اہم مذاکرات جاری

 روم: لبنان اور اسرائیل کے درمیان امریکی سرپرستی میں ہونے والے مذاکرات کا ساتواں دور اٹلی کے دارالحکومت روم میں شروع ہو گیا، جہاں دونوں فریق سرحدی اور سکیورٹی امور سمیت مختلف اہم معاملات پر بات چیت کر رہے ہیں۔

لبنانی سرکاری خبر رساں ادارے کے مطابق مذاکرات میں فریم ورک معاہدے پر عمل درآمد اور اس سے متعلق زیر التوا نکات پر غور کیا جا رہا ہے۔ سفارتی کوششوں کا مقصد دونوں ممالک کے درمیان کشیدگی میں کمی اور اختلافات کو مذاکرات کے ذریعے حل کرنا ہے۔

دوسری جانب حزب اللہ کے سیکریٹری جنرل نعیم قاسم نے ان مذاکرات پر سخت تحفظات کا اظہار کرتے ہوئے کہا کہ اسرائیل کے ساتھ براہِ راست مذاکرات لبنان کے مفاد میں نہیں ہیں اور ایسے اقدامات مزید مشکلات پیدا کر سکتے ہیں۔

اپنے ٹیلی وژن خطاب میں انہوں نے لبنانی صدر جوزف عون کے کردار پر بھی تنقید کرتے ہوئے کہا کہ قومی معاملات میں غیرجانبداری کو برقرار رکھنا ضروری ہے۔

نعیم قاسم کا کہنا تھا کہ لبنان کی خودمختاری اور قومی مفادات کے تحفظ کے لیے مضبوط قومی مؤقف اختیار کیا جانا چاہیے۔

تجزیہ کاروں کے مطابق روم میں ہونے والے یہ مذاکرات خطے میں جاری کشیدگی کم کرنے کی سفارتی کوششوں کا حصہ ہیں، تاہم مختلف سیاسی مؤقف مستقبل کی پیش رفت پر اثرانداز ہو سکتے ہیں۔