ہاکی ورلڈ کپ، پاکستان آج ویلز کے خلاف اہم میچ کھیلے گا

ہاکی ورلڈ کپ میں پاکستان اپنی مہم کے دوسرے میچ میں آج ویلز کے مدمقابل ہوگا۔ یہ مقابلہ قومی ٹیم کے لیے انتہائی اہمیت رکھتا ہے کیونکہ اگلے مرحلے میں رسائی کی امید برقرار رکھنے کے لیے پاکستان کو بہتر کارکردگی دکھانا ہوگی۔

پاکستان نے ٹورنامنٹ کا آغاز انگلینڈ کے خلاف 4-1 کی شکست سے کیا تھا۔ پہلے میچ میں قومی ٹیم نے گول کرنے کے کئی مواقع پیدا کیے، تاہم ان سے فائدہ نہ اٹھا سکی۔

کوچنگ اسٹاف نے بھی انگلینڈ کے خلاف مقابلے میں مواقع ضائع ہونے پر تشویش کا اظہار کیا ہے۔ قومی ٹیم نے کم از کم چار نمایاں مواقع گنوائے تھے۔

چار مرتبہ کی عالمی چیمپئن پاکستان ٹیم طویل وقفے کے بعد ورلڈ کپ میں واپس آئی ہے، اس لیے پہلے میچ کی شکست نے اس کی آئندہ پیش رفت کو مشکل بنا دیا ہے۔

دوسری جانب ویلز کو بھی اپنے افتتاحی میچ میں بھارت کے ہاتھوں 3-1 سے شکست کا سامنا کرنا پڑا تھا۔ اس لیے دونوں ٹیموں کے لیے آج کا مقابلہ اہمیت رکھتا ہے۔

مقابلہ پاکستانی وقت کے مطابق آج سہ پہر 3 بج کر 30 منٹ پر شروع ہوگا۔