پنجاب میں وائلڈ لائف کرائمز، ٹک ٹاکر ایمان علی سمیت 30 ملزمان کا چالان

پنجاب بھر میں وائلڈ لائف کرائمز کے خلاف سخت کارروائیوں کا سلسلہ جاری ہے، جس کے دوران معروف ٹک ٹاکر ایمان علی سمیت 30 ملزمان کے چالان کر دیے گئے ہیں۔ کارروائیوں کے دوران تقریباً دو درجن جنگلی پرندے بازیاب کرا لیے گئے جبکہ بٹیر اور فالکن کے 36 نیٹنگ گیئرز بھی ضبط کیے گئے ہیں۔ وائلڈ لائف ڈپارٹمنٹ کی رپورٹس کے مطابق مجموعی طور پر 27 ملزمان پر 9 لاکھ 19 ہزار روپے جرمانہ عائد کیا گیا ہے جبکہ دو ملزمان کے خلاف باضابطہ مقدمات درج کر لیے گئے ہیں۔

ترجمان وائلڈلائف رینجرز پنجاب کے مطابق چکوال میں اسسٹنٹ چیف وائلڈلائف رینجر مرزا عابد حسین نے سوشل میڈیا پر غیرقانونی شکار کی تصاویر اپ لوڈ کرنے پر ٹک ٹاکر ایمان علی کا چالان کرتے ہوئے 90 ہزار روپے جرمانہ کیا۔ اس کے علاوہ کارروائیوں میں 14 مور غیرقانونی قبضے میں رکھنے والے ملزم کے خلاف بھی قانونی کارروائی کا آغاز کر دیا گیا ہے، اور بازیاب کیے گئے موروں کو جوہرآباد وائلڈلائف پارک منتقل کر دیا گیا ہے۔

دستاویزات اور سرکاری اعداد و شمار کے مطابق ساہیوال ریجن میں ڈپٹی چیف وائلڈلائف رینجر سید عثمان الحسن کی سربراہی میں کارروائیاں کی گئیں جہاں فالکن اور بٹیر کے غیرقانونی شکار میں ملوث 6 افراد کے چالان کیے گئے۔ اٹک میں اسسٹنٹ چیف وائلڈلائف رینجر رضوانہ عزیز نے بٹیر کے غیرقانونی قبضے میں ملوث 4 افراد اور 2 تاجروں کو گرفتار کر کے 5 بٹیر برآمد کیے۔ تمام پنجرے تلف کر کے بٹیروں کو قدرتی ماحول میں آزاد کر دیا گیا ہے۔ ڈیرہ غازی خان، گوجرانوالہ، خوشاب، نارووال، ملتان اور ننکانہ صاحب میں بھی محکمہ وائلڈ لائف کی ٹیموں نے چھاپے مار کر غیرقانونی شکار میں ملوث عناصر پر جرمانے عائد کیے اور مسروقہ پرندوں کو محفوظ مقامات پر منتقل کیا۔