حکومت اور اپوزیشن مذاکرات میں پیش رفت، خیبرپختونخوا میں گورنر راج کا عندیہ

اسلام آباد میں حکومت اور پاکستان تحریک انصاف کی زیر قیادت اپوزیشن اتحاد کے درمیان پارلیمنٹ ہاؤس میں مذاکرات کا پہلا دور خوشگوار ماحول میں مکمل ہو گیا ہے، جس میں فریقین نے اپنے مطالبات ایک دوسرے کے سامنے رکھ دیے۔ مذاکرات کے دوران قومی اسمبلی کے اسپیکر سردار ایاز صادق نے بطور سہولت کار کردار ادا کیا جبکہ فریقین کے درمیان نماز جمعہ کے موقع پر 15 منٹ کا وقفہ بھی کیا گیا۔

مشیر وزیراعظم رانا ثناء اللہ نے میڈیا سے گفتگو کرتے ہوئے کہا کہ مذاکرات میں اپوزیشن نے بانی پی ٹی آئی کے علاج، مقدمات اور ملاقاتوں کے حوالے سے مطالبات پیش کیے۔ انہوں نے واضح کیا کہ خیبرپختونخوا حکومت کو دہشتگردی کے خلاف وفاق کی پالیسی کا ساتھ دینا ہوگا اور اسلام آباد پر چڑھائی کے منصوبے ختم ہونے چاہئیں۔ رانا ثناء اللہ نے مزید کہا کہ اگر ملک کا نقصان ہوتا دکھائی دیا تو آئینی اختیار کے تحت گورنر راج یا ایمرجنسی کا آپشن بھی موجود ہے۔

دوسری جانب چیئرمین پی ٹی آئی بیرسٹر گوہر اور سینیٹ میں اپوزیشن لیڈر علامہ راجہ ناصر عباس نے میڈیا سے گفتگو کرتے ہوئے کہا کہ اگر وفاق نے خیبرپختونخوا میں ایمرجنسی یا گورنر راج نافذ کیا تو ہم ہر آئینی و سیاسی آپشن استعمال کریں گے۔ اپوزیشن رہنماؤں کا کہنا تھا کہ احتجاج اور لانگ مارچ ہر صورت پرامن ہوگا جبکہ حکومت کے ساتھ مذاکرات کا آپشن بھی برقرار رکھا گیا ہے۔ اجلاس کے دوران وفاقی وزیر داخلہ محسن نقوی نے مذاکراتی وفود کو صوبے کی امن و امان کی صورتحال پر بریفنگ بھی فراہم کی۔