ریاض میں مکہ مشترکہ دفاعی معاہدے کی کمیٹی کا ہنگامی اجلاس آج ہوگا

سعودی عرب کے دارالحکومت ریاض میں مکہ مشترکہ دفاعی معاہدے کے تحت اسٹریٹجک پولیٹیکل اینڈ ڈیفنس کمیٹی کا ہنگامی اجلاس آج (5 اکتوبر) منعقد ہو رہا ہے۔ اجلاس میں خطے کی مجموعی سکیورٹی صورتحال، باہمی دفاعی تعاون اور سعودی عرب پر حوثیوں کے حملوں کے حوالے سے اہم امور پر تفصیلی تبادلہ خیال کیا جائے گا۔

میڈیا رپورٹس کے مطابق اس اہم ہنگامی اجلاس میں پاکستان کے نائب وزیراعظم اور وزیر خارجہ اسحاق ڈار خصوصی طور پر شرکت کر رہے ہیں۔ اجلاس میں معاہدے کے سیکریٹری جنرل لیفٹینٹ جنرل (ر) نعمان محمود بھی شریک ہوں گے۔ اس کے علاوہ ترکیہ کے وزیر خارجہ ہاکان فیدان، سعودی عرب کے وزیر خارجہ فیصل بن فرحان، ترک وزیر دفاع یاشر گلر اور ترک چیف آف جنرل اسٹاف جنرل سلجوق بایراکتار اوغلو بھی اس اعلیٰ سطح کے اجلاس میں شرکت کریں گے۔

ذرائع کا کہنا ہے کہ مکہ مشترکہ دفاعی معاہدے کی اسٹریٹجک اور ڈیفنس کمیٹی میں معاہدے کے رکن ممالک کے 2،2 نمائندے شامل ہیں۔ یہ اجلاس ایسے وقت میں طلب کیا گیا ہے جب یمنی صدر کی جانب سے حوثی ملیشیا کے خلاف بڑے فوجی آپریشن کا اعلان کیا گیا ہے، جس کے تحت حوثی ملیشیا کے زیر قبضہ علاقوں کو واپس لینے کے لیے بڑے پیمانے پر فوجی کارروائی عمل میں لائی جائے گی۔

حالیہ علاقائی کشیدگی اور حوثی حملوں کے تناظر میں ریاض میں ہونے والے اس اجلاس کو انتہائی اہمیت کا حامل قرار دیا جا رہا ہے۔ ذرائع نے یہ بھی بتایا ہے کہ رواں اجلاس کے بعد مکہ مشترکہ دفاعی معاہدے کی اسٹریٹجک اور ڈیفنس کمیٹی کا اگلا اجلاس آئندہ نومبر میں منعقد ہوگا۔