نو مئی ریڈیو حملہ کیس: سہیل آفریدی کے خلاف اشتہاری کی کارروائی شروع

پشاور کی انسداد دہشت گردی عدالت نے 9 مئی کو ریڈیو پاکستان پر ہونے والے حملے کے کیس میں نامزد ملزمان سہیل آفریدی اور عامر چمکنی کے خلاف اشتہاری قرار دینے کی قانونی کارروائی کا آغاز کر دیا ہے۔عدالت کی جانب سے دونوں ملزمان کے خلاف فوجداری قانون کی دفعہ 87 کے تحت باضابطہ نوٹسز جاری کر دیے گئے ہیں۔

پراسیکیوشن کے مطابق جاری کردہ نوٹسز ملزمان کے رہائشی اور دفتری پتوں پر آویزاں کیے جائیں گے۔ پراسیکیوشن نے واضح کیا ہے کہ اگر مقررہ وقت میں ملزمان عدالت کے سامنے پیش نہ ہوئے تو فوجداری قانون کی دفعہ 512 کے تحت انہیں باضابطہ طور پر اشتہاری قرار دے دیا جائے گا۔ قانونی کارروائی کے اگلے مرحلے میں اشتہاری قرار دیے جانے کے ساتھ ہی سہیل آفریدی اور عامر چمکنی کے خلاف دائمی وارنٹ گرفتاری بھی جاری کر دیے جائیں گے۔

واضح رہے کہ ریڈیو پاکستان حملہ کیس میں سہیل آفریدی کو ادارے کی مدعیانہ درخواست پر مقدمے میں نامزد کیا گیا تھا۔ پراسیکیوشن کے مطابق اس حساس نوعیت کے مقدمے میں 80 سے زائد ملزمان کو نامزد کیا گیا ہے جبکہ عدالت میں اس کیس کا باقاعدہ ٹرائل اس وقت زیر سماعت ہے۔