امریکا کا اسی ماہ عراق سے 2200 فوجی نکالنے کا اعلان

امریکی فوجی کمانڈر نے کہا ہے کہ امریکہ چند ہفتوں میں عراق سے اپنے2200 سےزیادہ فوجی نکال لے گا۔

جنرل کینیتھ میکینزی نے میڈیا نمائندوں سے گفتگو کرتے ہوئے کہا کہ عراق میں فوجیوں کی تعداد ستمبر کے دوران پانچ ہزار سے کم کرکے تین ہزار کی جا سکتی ہے۔

جنرل کینیتھ میکینزی کے مطابق باقی فوجی شدت پسند تنظیم نام نہاد دولتِ اسلامیہ کی ‘باقیات کو ختم کرنے کے لیے’ عراقی سیکیورٹی فورسز کی مشاورت اوران سے تعاون کرتے رہیں گے۔

گذشتہ ماہ امریکی صدر ڈونلڈ ٹرمپ نے اعادہ کیا تھا کہ وہ جلد از جلد عراق سے تمام فوجی واپس نکالنے کا ارادہ رکھتے ہیں۔

توقع ہے کہ وہ اس اقدام کو سنہ 2016 میں اپنی انتخابی مہم کے دوران امریکہ کو ‘لامتناہی جنگوں’ سے علیحدہ کرنے کے وعدے کی تکمیل کے طور پر پیش کریں گے۔

عراق میں امریکی فوجیوں کی موجودگی امریکہ کی جانب سے جنوری میں ایرانی جنرل قاسم سلیمانی کو بغداد میں ایک ڈرون حملے میں ہلاک کرنے کے باعث بھی تنازع بنی ہوئی ہے۔