نئے وزیراعظم کا انتخاب تھوڑی دیر بعد ہوگا

اسلام ٓٓباد:قومی اسمبلی میں نئے وزیراعظم کا انتخاب آج ہوگا، شاہ محمود اور شہباز شریف امیدوارہوں گے۔

قومی اسمبلی کے آج ہونے والے اجلاس کا ایجنڈا جاری کردیا گیا۔ دونکاتی ایجنڈے میں قائد ایوان کا انتخاب شامل ہے۔

قومی اسمبلی کا اجلاس آج دوپہر2بجے ہوگا۔ قومی اسمبلی سیکریٹریٹ نے اجلاس کا 2 نکاتی ایجنڈا جاری کردیا جس میں قائد ایوان کا انتخاب شامل ہے۔

قومی اسمبلی اجلاس  کارروائی آئین کے آرٹیکل 91 اور قاعدہ 32 کے تحت چلائی جائیگی۔نئے وزیراعظم  کے انتخاب کے لیے آج اسپیکر چیئر سے شیڈول پڑھ کر سنایا جائے گا۔قائد ایوان کے انتخاب کے لئے تمام ارکان کو ایوان میں کارروائی کا آغاز ہوتے ہی پہنچنا ہوگا۔ارکان کو ایوان میں حاضری کے لیے پانچ منٹس تک گھنٹیاں بجائی جائیں گی۔

تمام ارکان کے حاضر ہونے اور 5 منٹ گھنٹیاں بجنے کے بعد تمام دروازے بند کردیئے جائیں گے۔دروازے مقفل ہونے کے بعد کوئی رکن اندر سے باہر یا باہر سے اندر داخل نہیں ہوسکے گا۔

لابیز کے دروازوں پر سارجنٹ ایٹ آرمز متعین کردیے جائیں گے، اسپیکر چیئر سے ایوان کو دو حصوں میں تقسیم کردیا جائے گا۔ دونوں امیدواران کے لئے الگ الگ لابیز مختص کی جائیں گی جہاں ان کے ووٹر اپنے ووٹ کاسٹ کے ساتھ داخل ہونگے۔تمام ارکان کے ایوان سے رخصت ہونے کیساتھ ہی گھنٹیاں بجا کر حال کو بند کردیا جائیگا۔

نتائج کی گنتی مکمل ہونے کے بعد لابیز کھول دی جائیں گی اورارکان کے سامنے نتائج رکھے جائیں گے۔قائد ایوان منتخب ہونے کے لیے کسی بھی امیدوار کو 172 ووٹ درکار ہیں۔