اقوام متحدہ کی ایران امریکہ مذاکرات میں پاکستان کے کردار کی تعریف

اقوام متحدہ کے سیکریٹری جنرل انتونیو گوترس نے اسحاق ڈار سے ٹیلی فون پر گفتگو میں پاکستان کی سفارتی کوششوں کو سراہتے ہوئے کہا کہ اسلام آباد میں امریکہ اور ایران کے درمیان مذاکرات کے انعقاد نے خطے میں کشیدگی کم کرنے کی سمت ایک اہم قدم فراہم کیا ہے۔

انہوں نے پاکستان کے کردار کی تعریف کرتے ہوئے خطے میں امن کے فروغ کے لیے اس کی کوششوں کی مکمل حمایت کا اظہار کیا۔

انتونیو گوترس نے کہا کہ مشرقِ وسطیٰ کے بحران کا کوئی فوجی حل نہیں، اس لیے سنجیدہ اور بامعنی مذاکرات کا سلسلہ دوبارہ شروع ہونا چاہیے۔ انہوں نے اس بات پر بھی زور دیا کہ بین الاقوامی بحری آمدورفت کے حقوق اور آزادیوں کا احترام کیا جانا ضروری ہے۔

اس موقع پر نائب وزیرِ اعظم و وزیرِ خارجہ اسحاق ڈار نے بھی اس عزم کا اعادہ کیا کہ پاکستان خطے میں امن و استحکام کے لیے مکالمے اور سفارت کاری کے عمل کو جاری رکھے گا۔