آبنائے ہرمز میں امریکی پابندیوں کے نفاذ پر ممالک کو مشکلات کا سامنا ہوگا۔ ایران

ایران کی فوج کے ترجمان نے خبردار کیا ہے کہ جو بھی ملک امریکہ کی جانب سے ایران پر عائد پابندیوں پر عملدرآمد کرے گا اسے آبنائے ہرمز سے گزرنے میں “یقینی طور پر مشکلات” کا سامنا کرنا پڑے گا۔ 

تسنیم نیوز ایجنسی کے مطابق بریگیڈیئر جنرل اکرم نیا نے کہا کہ جنگ کے دوران دشمن اپنے کسی بھی ہدف کو حاصل نہیں کر سکا اور ایرانی نظام کا سیاسی توازن متاثر نہیں ہوا۔

انہوں نے کہا کہ اس کے برعکس ملک کے اندر اتحاد اور یکجہتی مزید مضبوط ہوئی ہے، جس کا مظاہرہ آج بھی سڑکوں پر عوام کی موجودگی سے دیکھا جا سکتا ہے۔ ان کے مطابق دشمن یہ دیکھ کر ناکام ہوا کہ وہ اس مزاحمت کو توڑ نہیں سکتا اور بالآخر جنگ بندی پر مجبور ہوا۔

اکرم نیا نے مزید کہا کہ جاری جنگ بندی کے دوران ایران نے اپنی افواج اور صلاحیتوں کو مزید مضبوط کیا ہے، اہداف کے نظام کو اپڈیٹ کیا ہے اور دفاعی و جارحانہ پوزیشنوں میں بہتری لائی ہے۔