ایران اور عمان کا آبنائے ہرمز سے ٹول فری گزرگاہ پر اتفاق

ایران اور عمان کے حکام نے آبنائے ہرمز سے ’’ٹول فری گزرگاہ‘‘ پر اتفاق کیا ہے۔

ایران اب آبنائے ہرمز کو عمان کے ساتھ ایک دوطرفہ معاملے کے طور پر پیش کر رہا ہے، اور گزشتہ چند ہفتوں کے دوران دونوں ممالک کے درمیان اس آبی گزرگاہ پر دوطرفہ مذاکرات بھی ہوئے ہیں۔ یہ اہم بات ایران کے اسپیکر محمد باقر قالیباف اور عمان کے وزیر خارجہ بدر البوسعيدی کے درمیان ملاقات میں سامنے آئی ہے۔
البوسعيدی نے تصدیق کی کہ اس اہم معاملے پر بات چیت ہوئی اور کہا کہ ایران اور امریکہ کے حالیہ مفاہمتی معاہدے (MoU) کے حوالے سے تعمیری مذاکرات ہوئے، خاص طور پر آبنائے ہرمز سے متعلق شق پر گفتگو ہوئی۔
انہوں نے کہا کہ ہم نے بین الاقوامی قانون کی پاسداری اور ٹول فری گزرگاہ کے اصول پر اتفاق کیا ہے۔ اطلاعات کے مطابق ایران اس اسٹریٹجک آبی گزرگاہ میں سیکیورٹی کے لیے فیس وصول کرنے کا خواہاں رہا ہے اور اس نے واضح طور پر کہا ہے کہ آبنائے ہرمز کی صورتحال جنگ سے پہلے جیسی نہیں رہے گی۔ تاہم فی الحال ایران اور عمان کے مطابق آبنائے ہرمز ٹول فری اور کھلی رہے گی۔