جاپان میں 7.2 شدت کا طاقتور زلزلہ، متعدد افراد زخمی

جاپان کے شمال مشرقی علاقوں میں جمعرات کی صبح طاقتور زلزلے کے جھٹکے محسوس کیے گئے، جس کے نتیجے میں کم از کم چار افراد کے زخمی ہونے کی اطلاعات موصول ہوئی ہیں۔

جاپانی موسمیاتی ادارے کے مطابق زلزلہ صبح کے وقت آیا جس کا مرکز صوبہ ایواتے کے مشرقی ساحلی علاقے کے قریب سمندر میں واقع تھا۔ زلزلے کی گہرائی تقریباً 40 کلومیٹر ریکارڈ کی گئی جبکہ بعد ازاں اس کی شدت 7.2 بتائی گئی۔

زلزلے کے جھٹکے ایواتے اور آؤموری سمیت کئی علاقوں میں شدت سے محسوس کیے گئے، جبکہ ہوکائیڈو، اکیتا، میاگی، یاماگاتا، فوکوشیما اور دارالحکومت ٹوکیو کے بعض حصوں میں بھی زمین لرز اٹھی۔

حکام کے مطابق زلزلے کے بعد کسی سونامی وارننگ کا اجرا نہیں کیا گیا، تاہم شہریوں کو ممکنہ آفٹر شاکس کے پیش نظر احتیاطی تدابیر اختیار کرنے کی ہدایت کی گئی ہے۔

دوسری جانب متعلقہ اداروں نے تصدیق کی ہے کہ متاثرہ علاقوں میں واقع جوہری تنصیبات اور نیوکلیئر پاور پلانٹس میں کسی قسم کی غیر معمولی صورتحال یا نقصان کی اطلاع نہیں ملی۔

جاپانی حکام نے ہنگامی امدادی اداروں کو الرٹ رکھتے ہوئے صورتحال کی مسلسل نگرانی جاری رکھنے کا اعلان کیا ہے۔