مجتبیٰ خامنہ ای کو والد کے جنازے میں شرکت کی اجازت نہ ملی

امریکی اخبار کی ایک رپورٹ میں دعویٰ کیا گیا ہے کہ ایران کے سیکیورٹی اداروں نے سیکیورٹی خدشات کے باعث سپریم لیڈر مجتبیٰ خامنہ ای کو اپنے والد آیت اللہ علی خامنہ ای کی نماز جنازہ اور تدفین میں شرکت کی اجازت نہیں دی۔

رپورٹ کے مطابق سیکیورٹی حکام کو خدشہ تھا کہ مجتبیٰ خامنہ ای کی عوامی موجودگی سے ان کی نقل و حرکت یا مقام کے بارے میں حساس معلومات سامنے آ سکتی ہیں، جس سے ممکنہ سیکیورٹی خطرات بڑھ سکتے ہیں۔

رپورٹ میں یہ بھی کہا گیا ہے کہ مجتبیٰ خامنہ ای نے جنازے میں شرکت کی خواہش ظاہر کی تھی، تاہم مبینہ طور پر سیکیورٹی وجوہات کی بنا پر انہیں کلیئرنس نہیں دی گئی۔

امریکی اخبار کے مطابق آئندہ دنوں میں مجتبیٰ خامنہ ای کی جانب سے کی جانے والی اہم سرکاری تقرریاں ایران کی سیاسی سمت کے حوالے سے اہم اشارہ سمجھی جا سکتی ہیں۔

رپورٹ میں ایران کے اندر مختلف سیاسی حلقوں کے درمیان پالیسی اختلافات کا بھی ذکر کیا گیا ہے، جہاں ایک طبقہ امریکا کے ساتھ مذاکرات کی مخالفت کرتا ہے، جبکہ بعض رہنما اقتصادی مسائل کے پیش نظر سفارتی رابطوں کے حق میں ہیں۔

واضح رہے کہ اس خبر میں شامل تمام دعوے امریکی اخبار کی رپورٹ اور اس کے نامعلوم ذرائع پر مبنی ہیں۔ ایرانی حکومت یا مجتبیٰ خامنہ ای کے دفتر کی جانب سے ان دعوؤں کی باضابطہ تصدیق یا تردید سامنے نہیں آئی ہے۔