عباس عراقچی کی تہران میں حماس اور حزب اللہ کے وفود سے الگ الگ ملاقاتیں

ایران کے وزیر خارجہ عباس عراقچی نے ہفتے کے روز تہران میں حماس اور حزب اللہ کے الگ الگ وفود سے ملاقاتیں کیں۔ دونوں وفود ایران کے سپریم لیڈر آیت اللہ علی خامنہ ای کی آخری رسومات میں شرکت کے لیے تہران پہنچے تھے۔

ایرانی وزارت خارجہ کے بیان کے مطابق، حماس کے وفد کی قیادت لیڈرشپ کونسل کے سربراہ محمد درویش نے کی۔ وفد نے آیت اللہ خامنہ ای کے انتقال پر تعزیت کا اظہار کیا اور وزیر خارجہ کو غزہ اور مغربی کنارے کی تازہ صورتحال سے آگاہ کیا۔ وفد نے عالمی برادری کے ردعمل کو “تباہ کن” قرار دیتے ہوئے اسرائیل کو جوابدہ ٹھہرانے کا مطالبہ کیا۔

محمد درویش نے فلسطینی کاز کے لیے ایران کی تاریخی حمایت کو سراہا اور حالیہ تنازع کے دوران ایران کی عسکری اور سفارتی کامیابیوں پر تہران کو مبارک باد بھی دی۔

دوسری جانب عباس عراقچی نے حزب اللہ کے ایک وفد سے بھی ملاقات کی، جس کی قیادت سینئر سیاسی رہنما اور سابق لبنانی رکن پارلیمنٹ محمد فنیش کر رہے تھے۔ وفد نے حزب اللہ کے سیکریٹری جنرل نعیم قاسم کی جانب سے خامنہ ای کے انتقال پر تعزیت پیش کی۔

ایرانی سرکاری خبر رساں ادارے کے مطابق، محمد فنیش نے امریکہ اور اسرائیل کے ساتھ حالیہ کشیدگی کے دوران ایران کی عسکری و سفارتی حکمت عملی اور لبنان کی حمایت کو سراہا۔

وزیر خارجہ عباس عراقچی نے دونوں وفود کا شکریہ ادا کرتے ہوئے فلسطینی ریاست کے قیام کے لیے ایران کی حمایت کا اعادہ کیا، حزب اللہ کی مزاحمت کو خراج تحسین پیش کیا اور شہید رہنما حسن نصر اللہ کو بھی خراج عقیدت پیش کیا۔ انہوں نے کہا کہ ایران جنگ بندی کی مفاہمتی یادداشت کے مطابق لبنان میں جنگ کے خاتمے کے لیے اپنی کوششیں جاری رکھے گا۔