پاسدارانِ انقلاب کا اردن میں امریکی اڈے پر بیلسٹک میزائل حملے کا دعویٰ

ایران کی پاسدارانِ انقلاب نے دعویٰ کیا ہے کہ اس نے اردن میں واقع شہزادہ حسن ایئر بیس پر موجود امریکی فوجی تنصیبات کو متعدد بیلسٹک میزائلوں سے نشانہ بنایا ہے۔

سرکاری نشریاتی ادارے آئی آر آئی بی کے مطابق جاری کردہ بیان میں آئی آر جی سی نے کہا کہ اس کی ایرو اسپیس فورس نے حملے کے دوران اڈے پر قائم امریکی کمانڈ اینڈ کنٹرول سینٹر کو تباہ کر دیا۔

بیان میں مزید دعویٰ کیا گیا ہے کہ حملے میں ایم کیو-9 ریپر ڈرونز رکھنے والے ہینگرز کو بھی نشانہ بنایا گیا، جس سے انہیں شدید نقصان پہنچا۔

تاہم اس دعوے کی فوری طور پر اردن یا امریکا کی جانب سے تصدیق یا تردید سامنے نہیں آئی، جبکہ حملے سے ہونے والے ممکنہ جانی یا مالی نقصان کی تفصیلات بھی ابھی جاری نہیں کی گئیں۔