کولمبیا میں شدید زلزلہ،111 افراد ہلاک،87 زخمی، متعدد لاپتا

کولمبیا میں طاقتور زلزلے نے بڑے پیمانے پر تباہی مچا دی، مختلف علاقوں میں عمارتیں منہدم ہونے سے کم از کم 111 افراد ہلاک جبکہ 87 زخمی ہوگئے۔ کئی افراد کے لاپتا ہونے کی اطلاعات ہیں اور خدشہ ہے کہ کچھ لوگ تاحال ملبے تلے پھنسے ہوئے ہیں۔

زلزلے کے شدید جھٹکوں کے باعث مغربی کولمبیا کے متعدد شہروں میں عمارتیں اور دیگر تعمیرات متاثر ہوئیں۔ امدادی ٹیمیں متاثرہ علاقوں میں پہنچ گئی ہیں اور ملبے میں دبے افراد کی تلاش کا کام جاری ہے۔

امریکی جیولوجیکل سروے کے مطابق زلزلے کی شدت 7.4 ریکارڈ کی گئی۔ زلزلے کا مرکز بحرالکاہل کے ساحل سے متصل کولمبیا کے صوبے چوکو کے کم آبادی والے علاقے میں بتایا گیا ہے، جبکہ زلزلے کی گہرائی تقریباً 107 کلومیٹر تھی۔

زلزلے کے بعد حکومت نے ملک میں ہنگامی حالت نافذ کردی ہے۔ صدر نے قوم سے خطاب میں کہا کہ حکومت متاثرہ علاقوں میں امدادی سرگرمیوں کو تیز کرنے اور انسانی جانوں کے تحفظ کے لیے تمام دستیاب وسائل بروئے کار لا رہی ہے۔

ریسکیو اہلکار متاثرہ علاقوں میں تلاش کا کام جاری رکھے ہوئے ہیں، جبکہ زخمیوں کو طبی امداد فراہم کرنے اور متاثرہ افراد کو محفوظ مقامات پر منتقل کرنے کے اقدامات بھی کیے جا رہے ہیں۔ حکام کے مطابق ہلاکتوں اور زخمیوں کی تعداد میں مزید اضافے کا خدشہ ہے۔