پڑوسی ممالک کی معاونت سے دہشتگردی ملک کی بقا کے لیے بڑا خطرہ بن چکی ہے، بلاول بھٹو

پاکستان پیپلزپارٹی کے چیئرمین بلاول بھٹو زرداری نے کہا ہے کہ پڑوسی ممالک کی فعال حمایت کے ساتھ دہشت گردی کا چیلنج اب پاکستان کی بقا کے لیے ایک سنگین خطرہ بن چکا ہے۔ سماجی رابطے کی ویب سائٹ پر جاری اپنے ایک بیان میں انہوں نے سیاسی مسائل کے حل کے لیے حکومت کی جانب سے اپوزیشن کے ساتھ مشترکہ سیاسی بات چیت کی تجویز قبول کیے جانے کا خیرمقدم کیا۔

بلاول بھٹو زرداری نے اپنے بیان میں مزید کہا کہ انہیں امید ہے کہ ان مذاکرات کے اختتام پر اپوزیشن غیرمشروط طور پر اپنا لانگ مارچ ختم کرنے کا اعلان کرے گی۔ انہوں نے اس عزم کا اعادہ کیا کہ پوری قوم کو متحد ہو کر اس دہشت گردی کی لعنت کا مقابلہ کرنا ہوگا اور ہمسایہ ممالک سے پیدا ہونے والے خطرات سے مؤثر انداز میں نمٹنا ہوگا۔ انہوں نے کہا کہ پاکستان پیپلزپارٹی ہر ممکن آئینی ذریعے سے دہشت گردی کا مقابلہ کرنے کے لیے ہمیشہ پرعزم رہی ہے اور آئندہ بھی اپنا بھرپور کردار ادا کرتی رہے گی۔

دریں اثنا، چیئرمین پیپلزپارٹی بلاول بھٹو زرداری سے سندھ کے مختلف حکام اور سیاسی رہنماؤں نے ملاقاتیں کیں۔ سابق رکن سندھ اسمبلی شہریار خان شر نے جہانگیر خان شر کے ہمراہ ملاقات کی جس میں گھوٹکی کی سیاسی صورت حال پر تفصیلی تبادلہ خیال کیا گیا۔ اس کے علاوہ سندھ کے چیف سیکرٹری آصف حیدر شاہ نے بھی بلاول بھٹو زرداری سے ملاقات کر کے صوبے کی مجموعی انتظامی صورت حال پر تفصیلی بریفنگ دی۔

ملاقاتوں کے اس سلسلے میں رکن سندھ اسمبلی شہباز درانی نے بھی بلاول بھٹو زرداری سے ملاقات کی اور انہیں شکارپور کے عوامی مسائل اور ان کے حل کے لیے اٹھائے جانے والے اقدامات سے آگاہ کیا۔ صوبائی وزیر مکیش کمار چاولہ اور ضلع شکارپور کے صدر عابد بھیو نے بھی الگ الگ ملاقاتیں کیں جن میں متعلقہ محکموں کی کارکردگی اور سیاسی و تنظیمی امور پر غور کیا گیا۔