ملکی معاشی مسائل کا حل برآمدات بڑھانے میں پوشیدہ ہے، محسن نقوی

وفاقی وزیر داخلہ محسن نقوی نے لاہور چیمبر آف کامرس اینڈ انڈسٹری کی تقریب سے خطاب کرتے ہوئے کہا ہے کہ ملکی معاشی مسائل کا حل صرف اور صرف برآمدات بڑھانے میں پوشیدہ ہے اور اگر ہم میڈ اِن پاکستان کی پالیسی پر عمل پیرا ہو جائیں تو تمام مشکلات ختم ہو سکتی ہیں۔

محسن نقوی نے تقریب کے دوران گفتگو کرتے ہوئے بتایا کہ انہوں نے پچھلے 3 یا 4 ماہ کے دوران ایران کے متعدد دورے کیے ہیں اور جو لوگ ایران نہیں گئے، ان کا خیال ہے کہ وہ ایک تباہ حال ملک ہے لیکن حقیقت اس کے برعکس ہے۔ ایران میں کنسٹرکشن اور آٹو انڈسٹری سمیت ہر طرح کی صنعت لگی ہوئی ہے اور وہاں تمام مصنوعات ملک کے اندر تیار کی جا رہی ہیں۔ انہوں نے سوال اٹھایا کہ اگر ایران پابندیوں کے باوجود آگے بڑھ سکتا ہے اور ہر چیز اپنے ملک میں بنا سکتا ہے تو پاکستان ایسا کیوں نہیں کر سکتا؟

وفاقی وزیر داخلہ کا کہنا تھا کہ حکومت ملکی نظام کو ری سیٹ کرنے پر کام کر رہی ہے اور اس عمل میں تاجر برادری اور عوام کو بھرپور تعاون کرنا ہوگا۔ انہوں نے مزید کہا کہ تاجروں کی سہولت کے لیے بزنس پاسپورٹ پر تیزی سے کام جاری ہے اور اس ضمن میں تمام متعلقہ سفارت خانوں کو بھی ہدایات جاری کی گئی ہیں تاکہ کاروباری طبقے کو درپیش ویزا مسائل کا مستقل حل نکالا جا سکے اور انہیں تمام ممکنہ سہولیات فراہم کی جا سکیں۔