پاکستان کشمیریوں کی حفاظت کر رہا ہے،فاروق عبداللہ کا بیان، بی جے پی کا سخت ردعمل

مقبوضہ کشمیر کے سابق وزیراعلیٰ اور نیشنل کانفرنس کے سربراہ فاروق عبداللہ نے کہا ہے کہ پاکستان ہر موقع پر کشمیریوں کے ساتھ کھڑا ہے اور ان کی حفاظت کر رہا ہے۔

بھارتی خبر ایجنسی اے این آئی کے مطابق مقبوضہ کشمیر کے علاقے بارہ مولہ میں ایک تقریب سے خطاب کرتے ہوئے فاروق عبداللہ نے سوال کیا کہ کیا لوگوں کو دہلی حکومت سے یہ امید ہے کہ وہ انہیں انصاف فراہم کرے گی؟

انہوں نے کہا کہ کشمیریوں کو اپنے حقوق کے لیے متحد ہونا ہوگا اور ان میں بھارتی حکومت کا مقابلہ کرنے اور اس کے خلاف ڈٹ کر کھڑے ہونے کی ہمت ہونی چاہیے۔ ان کا کہنا تھا کہ اگر ایسا نہ کیا گیا تو کشمیریوں کا وجود، نام و نشان اور شناخت ختم ہوجائے گی اور کوئی انہیں یاد تک نہیں رکھے گا۔

#WATCH | Baramulla, Jammu and Kashmir: National Conference Chief Farooq Abdullah says, "…What can you expect from Delhi? You must have the courage to stand up to them and fight. If you do not, you will be wiped out. Your name and identity will disappear, and no one will even… pic.twitter.com/g15NYlvgvY

— ANI (@ANI) October 24, 2026

فاروق عبداللہ نے کہا کہ پاکستان مسلسل مسئلہ کشمیر کو اجاگر کر رہا ہے اور ہر جگہ یہ مؤقف پیش کرتا ہے کہ مسئلہ کشمیر اب تک حل نہیں ہوا۔ ان کے بقول پاکستان کشمیریوں کی حفاظت کر رہا ہے، ورنہ بھارت کے ارادے ٹھیک نہیں ہیں۔ وہ کہتے کچھ ہیں، لیکن کرتے اس کے برعکس ہیں۔

نیشنل کانفرنس کے سربراہ نے کہا کہ کشمیریوں میں سچ کا ساتھ دینے اور اس پر ڈٹ جانے کا حوصلہ ہونا چاہیے۔ سچ بولنا آسان نہیں ہوتا، لیکن جب تک سچ نہیں بولا جائے گا اور اس پر مضبوطی سے قائم نہیں رہا جائے گا، مستقبل محفوظ نہیں ہوسکتا۔

بی جے پی کا سخت ردعمل، معافی کا مطالبہ

دوسری جانب فاروق عبداللہ کے بیان پر بھارتیہ جنتا پارٹی (بی جے پی) نے سخت ردعمل دیتے ہوئے ان سے معافی مانگنے کا مطالبہ کیا ہے۔

مقبوضہ کشمیر میں بی جے پی کے صدر ست شرما نے فاروق عبداللہ سے بھارتی عوام سے معافی مانگنے کا مطالبہ کرتے ہوئے کہا کہ ان کے بیانات ناقابل قبول ہیں۔ انہوں نے کہا کہ اگر فاروق عبداللہ کو پاکستان سے اتنی ہی گہری محبت ہے تو انہیں پاکستان جا کر وہاں آباد ہوجانا چاہیے۔