روس کے صدر ولادیمیر پوتن کی ایرانی صدر اور امیرِ قطر سے ملاقاتیں آج متوقع

روس کے صدارتی محل کریملن کے مطابق صدر ولادیمیر پوتن منگل کو ماسکو میں ایرانی صدر مسعود پزشکیان اور قطر کے امیر شیخ تمیم بن حمد آل ثانی سے ملاقات کریں گے۔ یہ پیش رفت ایسے وقت میں سامنے آئی ہے جب مشرقِ وسطیٰ میں جاری کشیدگی کم کرنے کے لیے سفارتی کوششیں تیز ہو رہی ہیں۔

اس سے قبل پیر کے روز تہران میں پاکستان، ایران، سعودی عرب اور ترکیہ کے اعلیٰ حکام کا مشترکہ اجلاس ہوا، جس میں خطے کی صورتِ حال، کشیدگی میں کمی اور کسی ممکنہ معاہدے تک پہنچنے کے لیے سفارتی راستوں پر تبادلۂ خیال کیا گیا۔

تہران کے سعدآباد میں ہونے والے اس اجلاس میں ایرانی صدر مسعود پزشکیان کے علاوہ سپریم نیشنل سکیورٹی کونسل کے سیکریٹری محسن رضائی اور وزیرِ خارجہ عباس عراقچی بھی شریک ہوئے۔

پاکستان کی جانب سے چیف آف ڈیفنس فورسز فیلڈ مارشل عاصم منیر اور وزیرِ داخلہ محسن نقوی نے شرکت کی، جبکہ سعودی عرب کے وزیرِ دفاع شہزادہ خالد بن سلمان اور ترکیہ کے انٹیلیجنس ادارے کے سربراہ ابراہیم قالن بھی اجلاس میں موجود تھے۔

چاروں ممالک کے اعلیٰ حکام کی یہ ملاقات خطے میں جاری کشیدگی کم کرنے اور سفارتی رابطوں کو آگے بڑھانے کی کوششوں کا حصہ ہے۔ دوسری جانب روسی صدر کی ایرانی صدر اور امیرِ قطر سے متوقع ملاقاتوں کو بھی خطے کی بدلتی صورتِ حال کے تناظر میں اہم پیش رفت کے طور پر دیکھا جا رہا ہے۔

تہران میں ہونے والے اجلاس سے متعلق خبر رساں اداروں روئٹرز اور وانا کی جانب سے تصاویر بھی جاری کی گئی ہیں، جن میں اجلاس میں شریک اعلیٰ حکام کو دیکھا جا سکتا ہے۔