پاکستانی خاتون باکسر عابدہ بتول نے عالمی ٹائٹل جیت لیا

کوئٹہ سے تعلق رکھنے والی 26 سالہ پاکستانی باکسر عابدہ بتول نے عالمی سطح پر ملک کا نام روشن کرتے ہوئے ویمنز انٹرنیشنل باکسنگ ایسوسی ایشن کا عالمی ایٹم ویٹ ٹائٹل اپنے نام کر لیا۔ وہ یہ اعزاز حاصل کرنے والی پاکستان کی پہلی خاتون باکسر بن گئی ہیں۔

عابدہ بتول نے 31 اکتوبر کو تھائی لینڈ کے شہر پٹایا میں منعقدہ ’’بریو ہارٹس‘‘ باکسنگ مقابلے میں مقامی باکسر وانڈی سینونگ کھروٹ کا سامنا کیا۔ آٹھ راؤنڈز پر مشتمل یہ مقابلہ پانچویں راؤنڈ میں اس وقت روک دیا گیا جب دونوں کھلاڑیوں کے سر ٹکرانے سے عابدہ بتول کی ناک میں فریکچر ہوگیا۔

رنگ سائیڈ ڈاکٹر نے مقابلہ روکنے کے بعد ججز کے اسکور کارڈز کی بنیاد پر فیصلہ سنایا۔ دو ججز نے عابدہ بتول کے حق میں فیصلہ دیا، جبکہ ایک جج نے ان کی حریف کو برتری دی۔ اس طرح پاکستانی باکسر نے اسپلٹ ٹیکنیکل فیصلے کے ذریعے عالمی چیمپئن کا اعزاز حاصل کر لیا۔

عابدہ بتول کا اس مقام تک پہنچنے کا سفر مشکلات سے بھرپور رہا۔ انہوں نے 2018 میں باکسنگ شروع کی تو انہیں مالی مسائل کے ساتھ اہلِ خانہ کی مخالفت کا بھی سامنا کرنا پڑا، تاہم انہوں نے ہمت نہیں ہاری اور مسلسل محنت کے ذریعے اپنی صلاحیتوں کا لوہا منوایا۔

وہ اس سے قبل پاکستان کا قومی پروفیشنل باکسنگ ٹائٹل بھی جیت چکی ہیں، جبکہ مکسڈ مارشل آرٹس، ووشو اور کک باکسنگ کے مقابلوں میں بھی حصہ لے چکی ہیں۔ رواں سال جنوری میں انہوں نے ڈبلیو بی سی ایشیا ایٹم ویٹ ٹائٹل کے لیے بھی مقابلہ کیا تھا، تاہم اس میں انہیں شکست ہوئی تھی۔

عالمی اعزاز حاصل کرنے کے بعد عابدہ بتول نے اپنے اہلِ خانہ، کوچ شارق خان، اسپانسرز اور پاکستانی قوم کا شکریہ ادا کیا۔ ان کی کامیابی کو پاکستان میں خواتین کی باکسنگ کے لیے اہم پیش رفت قرار دیا جا رہا ہے، جبکہ بلوچستان اور بالخصوص کوئٹہ کی نوجوان لڑکیوں کے لیے بھی یہ کامیابی حوصلہ افزائی کا باعث بن سکتی ہے۔