مریدکے اور راولپنڈی میں مختلف ٹریفک حادثات کے دوران سابق آرمی آفیسر سمیت 2 افراد جاں بحق

مریدکے اور راولپنڈی میں پیش آنے والے ٹریفک کے مختلف حادثات کے نتیجے میں سابق آرمی آفیسر سمیت 2 افراد جاں بحق اور دیگر افراد شدید زخمی ہو گئے ہیں۔

مریدکے میں جی ٹی روڈ کھوڑی کے قریب سڑک کی خرابی کے باعث موٹر سائیکل سوار سڑک پر گر کر شدید زخمی ہو گئے۔ پولیس حکام کے مطابق زخمی ہونے والوں میں 51 سالہ سلیم جو کہ ایک فارماسیوٹیکل کمپنی کے منیجر ہیں، اور 30 سالہ طارق ولد اقبال شامل ہیں جو لاہور کے رہائشی ہیں۔ دونوں زخمیوں کو تشویشناک حالت میں لاہور کے ہسپتال منتقل کر دیا گیا ہے۔

اسی علاقے میں پرانا نارنگ روڈ پر ایک اور حادثہ پیش آیا جہاں موٹر سائیکل سوار نامعلوم گاڑی کے پیچھے جا ٹکرایا۔ پولیس کے مطابق اس حادثے میں زخمی ہونے والا 45 سالہ عامر شہزاد جو کہ سابق آرمی آفیسر تھا، ٹی ایچ کیو ہسپتال میں دوران علاج جاں بحق ہو گیا۔ پولیس نے ضروری کارروائی کے بعد لاش لواحقین کے حوالے کر دی ہے جبکہ حادثات کی تحقیقات شروع کر کے ذمہ داروں کے خلاف سخت کارروائی کا عزم ظاہر کیا گیا ہے۔

دوسری جانب راولپنڈی کے مری روڈ پر ایک اور اندوہناک حادثہ پیش آیا جہاں تیز رفتار گاڑی نے سڑک عبور کرنے والی 2 خواتین کو ٹکر مار دی۔ پولیس کے مطابق حادثے کے نتیجے میں ثناء سلیم نامی خاتون موقع پر ہی جاں بحق ہو گئی جس کا تعلق آزاد کشمیر سے تھا، جبکہ دوسری خاتون شدید زخمی ہو گئی۔ زخمی خاتون کو فوری طور پر تشویشناک حالت میں بینظیر بھٹو اسپتال منتقل کر دیا گیا۔ پولیس نے بتایا کہ حادثے کے بعد ڈرائیور گاڑی سمیت موقع سے فرار ہونے میں کامیاب ہو گیا جس کی تلاش کے لیے چھاپے مارے جا رہے ہیں۔