امریکہ اور اسرائیل کے خلاف فیصلہ کن اور دردناک فوجی کارروائیوں کا انتباہ

تہران اور واشنگٹن کے درمیان بڑھتی ہوئی کشیدگی اور مشرق وسطیٰ میں جنگ کے بادلوں کے درمیان ایران نے امریکہ اور اسرائیل کے خلاف طاقتور اور دردناک فوجی کارروائیوں کا اعلان کیا ہے۔ ایران کی پاسدارانِ انقلاب کے نائب کمانڈر انچیف میجر جنرل مصطفیٰ ایزدی نے ایک انٹرویو میں واضح کیا ہے کہ امریکہ اور اسرائیل کی جانب سے مسلط کردہ جنگ کے بعد ایران نے اپنی دفاعی صلاحیتوں اور فوجی تیاریوں میں نمایاں اضافہ کیا ہے۔

میجر جنرل مصطفیٰ ایزدی کے مطابق جنگ کے دوران ایران نے یہ ثابت کر دیا ہے کہ وہ مکمل عزم، بھرپور تیاری اور طاقت کے ساتھ مؤثر فوجی کارروائیاں کرنے کی پوری صلاحیت رکھتا ہے۔ انہوں نے کہا کہ دشمن ملکوں کی کسی بھی مہم جوئی کا منہ توڑ جواب دیا جائے گا۔

دوسری جانب اسرائیلی وزیراعظم بینجمن نیتن یاہو کی جانب سے ایران کے خلاف جنگ دوبارہ شروع کرنے کے لیے امریکی صدر ڈونلڈ ٹرمپ پر مسلسل دباؤ ڈالا جا رہا ہے۔ اس صورتحال کے پیش نظر اسرائیلی خفیہ ایجنسی موساد کے سربراہ رومن گوفمین اہم ترین دورے پر واشنگٹن پہنچ گئے ہیں، جہاں وہ امریکی حکام اور سینٹرل انٹیلی جنس ایجنسی (سی آئی اے) کے ڈائریکٹر جان ریٹکلف سے ملاقاتیں کر رہے ہیں۔ امریکی میڈیا رپورٹس کے مطابق صدر ٹرمپ نے فی الحال ایران کے خلاف براہ راست فوجی کارروائی کا مطالبہ مسترد کرتے ہوئے اقتصادی دباؤ اور بحری ناکہ بندی جاری رکھنے کی پالیسی کی حمایت کی ہے۔