کراچی ٹیسٹ۔سری لنکا کی ٹیم 271 رنز بناکر آؤٹ

کراچی میں کھیلے جا رہےدوسرے ٹیسٹ کے دوسرے دن سری لنکا کی ٹیم پاکستان کے 191 رنز کے جواب میں 271 رنز بناکر آؤٹ ہوگئی۔

پاکستان نے دوسری اننگز میں بغیر کسی نقصان کے57 رنز بنا لیے ہیں، سری لنکا کی پہلی اننگز کا اسکور برابرکرنے کیلیے قومی ٹیم کو مزید23رنزدرکا ہیں۔اس وقت عابد علی32اور شان مسعود21رنز پر کریزپرموجود ہیں۔کل کھیل کا تیسرا روز ہو گا۔

نیشنل اسٹیڈیم کراچی میں میچ پاکستان اور سری لنکا کے درمیان دوسرا ٹیسٹ کھیلا جارہا ہے، قومی ٹیم نے پہلے دن ٹاس جیت کر پہلے بیٹنگ کی اور 191 رنز بناکر آؤٹ ہوگئی تھی جب کہ سری لنکا نے3 کھلاڑیوں کے نقصان پر64 رنز بنائے تھے۔

ٹیسٹ میچ کے دوسرے دن سری لنکا نے قومی ٹیم کے 191 رنز کے جواب میں 271 رنز بنائے اور آؤٹ ہوگئی جس کے بعد آئی لینڈرز کو پاکستان پر80 رنز کی برتری حاصل ہوگئی ہے۔ پاکستان کی جانب سے شاہین شاہ آفریدی نے 5 اور محمد عباس نے 4 وکٹیں حاصل کیں، 19 سالہ شاہین شاہ آفریدی نے پہلی بار ٹیسٹ اننگز میں 5 وکٹیں لیں۔

واضح رہے کہ پاکستان اور سری لنکا کے درمیان پہلا ٹیسٹ میچ راولپنڈی میں کھیلا گیا تھا جو بارش اور خراب موسم کے باعث ڈرا ہوگیا تھا۔