آرمی ایکٹ۔جے یوآئی (ف)کا مزاحمت،جماعت اسلامی کا لاتعلق رہنے کا اعلان

جے یوآئی (ف) نے آرمی ایکٹ پرقانون سازی کیخلاف مزاحمت اورجماعت اسلامی نے لاتعلق رہنے کا اعلان کردیا۔

جے یو آئی (ف) کے سربراہ مولانا فضل الرحمن نے آرمی ایکٹ ترمیمی بل کی مخالفت اور بھرپور مزاحمت کا اعلان کرتے ہوئے کہا کہ پارلیمنٹ میں آرمی چیف کی مدت ملازمت میں توسیع کے حوالے سے بل لایا جا رہا ہے،یہ مسئلہ اہم نوعیت کا ہے جس میں عوام کا مینڈیٹ چوری کرکے بنائی اسمبلی کو قانون سازی کا حق نہیں دے سکتے۔

مولانا فضل الرحمن نے کہا کہ (ن) لیگ کا فرض تھا تمام جماعتوں کو اکٹھا کرتی، لیکن بدقسمتی سے ایسا نہیں کیا جا سکا، بہت عجلت کے ساتھ سب کچھ کیا جارہا ہے، جے یو آئی (ف) اس قانون سازی سے لاتعلق رہے گی

مولانا فضل الرحمن نے کہا کہ ووٹنگ میں حصہ لینا جعلی اسمبلی کی کارروائی کا حصہ بننا ہوگا،ایسی قانون سازی کیلیے جمہوری ماحول چاہیے، فوج ہمارا دفاعی ادارہ ہے،  فوج کا ادارہ اوراس کا سربراہ غیرمتنازع ہیں،انہیں متنازع نہیں بنانا چاہتے۔

بعد ازاں جماعت اسلامی کے امیر سینیٹر سراج الحق نے بھی میڈیا سے بات کرتے ہوئے اس بل سے لاتعلق رہنے کا اعلان کرتے ہوئے کہا کہ ہم نے طے کیا ہے کہ ہم وفاقی حکومت کے اس بل کی حمایت نہیں کریں گے، قانون سازی میں جلد بازی کرنا ملک وقوم کے مفاد میں نہیں، جماعت اسلامی جمہوری جماعت ہے تمام امور میں اپنی جماعت میں مشاورت کرتے ہیں۔

سراج الحق کا کہنا تھا کہ ہرقانون میں ذات اور پارٹی مفادت کے بجائے عوام اور ملک کے مفاد کو ترجیح دینی چاہیے، کسی بھی مشکل آزمائش کے لمحے پوری قوم فوج کے شانہ بشانہ ہو گی، ہمیں پہلے سے بھی زیادہ طاقتور اور باصلاحیت فوج کی ضرورت ہے، پڑوس میں ہم سے 8 گنا بڑی طاقت ہے، حکومت ہند روز دھمکیاں دے رہی ہے۔