قیامت کی گھڑی میں حکومتی ترجمانوں کو جگتیں سوجھ رہی ہیں

پاکستان مسلم لیگ(ن)کی ترجمان مریم اورنگزیب نے کہاہے کہ قوم زندگی موت کی کشمکش میں ہے،حکومتی ترجمانوں نے سیاسی تماشہ لگایا ہوا ہے،عوام کے گھروں میں قیامت آئی ہوئی ہے،حکومتی ترجمانوں کو جگتیں سوجھ رہی ہیں،اگران کا یہ رویہ نہ ہوتا تو قوم اور ملک آج اس افراتفری اورانتشار میں نہ ہوتا۔

ترجمان مسلم لیگ ن مریم اورنگزیب نے کہاہے کہ کرونا کا مقابلہ سوشل میڈیا پر جگت بازی سے نہیں ہوگا ،نوازشریف اور شہبازشریف کی صحت کی بنائی ہوئی سہولیات کو ہی استعمال کیاجارہا ہے ،شہبازشریف کا بنایا ہوا ڈیش بورڈ آج کرونا سے بچانے کےلیے استعمال ہورہا ہے۔

مریم اورنگزیب کا کہنا تھا کہ ‎حکومتی ترجمان اور وزراء سیاسی نمبر سکورنگ سے کچھ عرصہ کے لیے پرہیز کریں تو بہتر ہوگا، ‎اس نوعیت کے بیانات سے معاشرے میں انتشار بڑھے گا، حالات اس کے متحمل نہیں ہو سکتے، حالات کی سنگینی کو دیکھتے ہوئے ذاتیات، سیاسی انا سے اوپر اٹھتے ہوئے دانشمندی کا مظاہرہ کرنا ہوگا، قوم آپ کی طرف دیکھ رہی ہے، اس طرح کی گفتگو کرکے قوم کو مزید مایوس نہ کریں۔