سوات: نشہ نہ ملنے پر باپ نے بیٹے کو مار ڈالا،بیوی زخمی

سوات (امت نیوز) نشہ نہ ملنے پر اسکول کے پرنسپل نے اپنے جواں سال بیٹے کو قتل اور بیوی کو زخمی کردیا۔ تخت بھائی کےعلاقہ پیر صدئے میں اسکول کے پرنسپل نے آئس نشہ نہ ملنے پر گھر کے اندر فائرنگ کردی، جس کے نتیجے میں پرنسپل کا جوان بیٹا جانبحق اور بیوی شدید زخمی ہوگئی۔

پولیس حکام کے مطابق تھانہ شیر گڑھ کے حدود پیر صدئے میں سرکاری اسکول کے پرنسپل شاہ جہان نے آئس کا نشہ نہ ملنے پر اپنے گھر میں فائرنگ کی تھی، واقعے میں ملزم کا بیٹا بابر جان بحق اور بیوی زخمی ہوئی۔

واقعے کی اطلاع ملتے ہی پولیس اور ریسکیو کی ٹیمیں جائے وقوعہ پر پہنچیں اور لاش اور زخمی کو ایم ایم سی اسپتال منتقل کردیا گیا، جب کہ پولیس نے ملزم شاہ جہان کو گرفتار کرلیا ہے۔ پولیس کے مطابق مبینہ ملزم کالام سوات میں سرکاری اسکول کا پرنسپل ہے۔