نوازشریف کی مریم نوازکی موجودگی میں شہبازشریف کواہم ہدایت

مسلم لیگ ن کے قائد نواز شریف نے وزیر اعظم کو ملک بالخصوص پنجاب میں ہر صورت قانون کی عمل داری کو یقینی بنانے کی ہدایت کردی۔
میڈیا رپورٹس کےمطابق  وزیراعظم شہبازشریف کی ن لیگ کی چیف آرگنائزراور نائب صدر مریم نواز سے ملاقات ہوئی۔ جس میں
نوازشریف بھی ویڈیو لنک کے ذریعے شریک ہوئے۔
اجلاس میں ملکی سیاسی صورتحال سمیت اہم امور پر تبادلہ خیال اور پولیس ، سکیورٹی اداروں پر پی ٹی آئی کارکنوں کے حملوں پر تشویش کا اظہار کیا گیا۔
نواز شریف نے وزیر اعظم کو ہر صورت قانون کی عمل داری کو یقینی بنانے کی ہدایت کرتے ہوئے کہا کہ ہم نے ہمیشہ اداروں اور عدالتوں کا احترام کیا اور جب بھی بلایا گیا تو پیش ہوئے۔
نواز شریف نے مسلم لیگ ن کے صدر اور وزیر اعظم کو یہ بھی ہدایت کی کہ تمام اتحادیوں کی مشاورت سے فیصلے کیے جائیں۔ پنجاب اور خیبرپختونخوا انتخابات میں قربانیاں دینے والے کارکنوں کو ٹکٹ کے معاملے میں ترجیح دی جائے۔

اس موقع پر وزیراعظم نے نوازشریف اور مریم نواز کو اتحادی جماعتوں کے پیر کے روز بلائے جانے والے اجلاس کے معاملے پر اعتماد میں بھی لیا۔