سعودی خاتون خلاباز ریانہ برناوی دادی کی بالیاں بھی خلا میں لے گئیں

ریاض (نیٹ نیوز) سعودی عرب سے تعلق رکھنے والی ریانہ برناوی اپنے ساتھ دادی کی بالیاں بھی خلا میں لے گئیں۔ اسپیس ایکس کا تاریخی خلائی مشن سعودی خاتون سمیت 4 خلاء بازوں کو بین الاقوامی خلائی اسٹیشن کے لیے 22 مئی کو روانہ ہوا تھا۔

مشن پر جانے والی پہلی سعودی خاتون ریانہ برناوی اور ساتھیوں کی بین الاقوامی خلائی اسٹیشن پہنچنے کی تصاویر سامنے آرہی ہیں جس میں تمام ہی افراد خاصے خوش دکھائی دے رہے ہیں۔

حلّقت بحلق جدتي للفضاء 🤍#نحو_الفضاء

Grandma, i flew your earrings to space 🤍#KSA2Space pic.twitter.com/J4ZUNoSHlg

— RAYYANAH BARNAWI (@Astro_Rayyanah) May 24, 2023

ریانہ برناوی نے اپنے ٹوئٹر اکاؤنٹ پر ایک تصویر شیئر کی ہے جس میں وہ خوش و خرم نظر آرہی ہیں۔ فوٹو میں وہ اپنی بالیاں انگلی کے اشارے سے دکھا رہی ہیں در اصل وہ اپنے ساتھ دادی کی بالیاں بھی خلا میں ساتھ لے گئی ہیں۔

سعودی عرب سے تعلق رکھنے والی بریسٹ کینسر ریسرچر ریانہ برناوی اس مشن میں سعودی ساتھی علی القرنی کے ساتھ خلائی مشن پر روانہ ہوئی ہیں جو ایک فائٹر پائلٹ ہیں۔ ان کے علاوہ پیگی وٹسن اور جان شوفنر بھی اس خلائی مشن پر روانہ ہوئے ہیں۔

عرب میڈیا کے مطابق بین الاقوامی خلائی اسٹیشن پر 8 دن قیام کے دوران یہ چاروں خلاء باز 20 تحقیقی منصوبوں پر کام کریں گے۔