خیبرپختونخوا حکومت کا آئینی بینچز کے قیام پر غور

خیبر پختونخوا(اُمت نیوز)مشیرِ اطلاعات خیبر پختون خوا بیرسٹر محمد علی سیف کا کہنا ہے کہ خیبر پختون خوا حکومت نے آئینی بینچز کے قیام پر غور شروع کر دیا ہے۔

نجی ٹی وی کے پروگرام سے گفتگو کرتے ہوئے بیرسٹر سیف نے کہا کہ مشاورت کے بعد کے پی حکومت آئینی بینچز کے قیام کا فیصلہ کرے گی۔

انہوں نے کہا کہ اسپیکر کے پی اسمبلی سرکاری دورے پر بیرونِ ملک ہیں، وہ واپس آئیں گے تو معاملے پر مزید مشاورت کی جائے گی۔

بیرسٹر سیف کا یہ بھی کہنا ہے کہ خیبر پختون خوا اسمبلی میں بھی آئینی بینچز سے متعلق قرار داد پاس کرانے پر غور جاری ہے۔

واضح رہے کہ کچھ روز قبل سندھ اسمبلی نے 26 آئینی ترمیم کے تحت صوبے میں آئینی بینچز کی تشکیل سے متعلق قرارداد کثرتِ رائے سے منظور کی تھی۔

قرارداد صوبائی وزیرِ داخلہ ضیاءالحسن لنجار نے پیش کی تھی۔

ایوان میں موجود ارکان نے کھڑے ہو کر رائے شماری میں حصہ لیا تھا، قرارداد کے حق میں 123 اراکین نے ووٹ دیا تھا۔