ایران پر امریکہ کی جارحیت بے بنیاد، مدد کریں گے ، پیوٹن

ماسکو: روس کے صدر ولادیمیر پیوٹن نے ایرانی وزیر خارجہ عباس عراقچی سے ملاقات میں کہا ہے کہ ایران کے خلاف جارحیت بے بنیاد ہے، ایرانی عوام کی مدد کریں گے۔

نجی ٹی وی کے مطابق روسی صدر نے عباس عراقچی کو یقین دلایا کہ ایرانی عوام کی مدد کریں گے، حالیہ واقعات پر ہمارا مؤقف وزارت خارجہ کے ذریعے پہنچا دیا گیا ہے۔

ولادیمیر پیوٹن نے کہا کہ یہ ملاقات ہمیں موجودہ صورتحال سے نکلنے کے راستے تلاش کرنے کا موقع فراہم کرے گی، کشیدگی ختم کرنے کی راہ ہموار ہو گی۔

اس موقع پرعباس عراقچی نے کہا کہ روس اورایران کے دشمن مشترکہ ہیں، اقوام متحدہ ایران پر امریکی حملے کی مذمت کرے۔

قبل ازیں ایرانی وزیر خارجہ نے اقوام متحدہ کے سیکرٹری جنرل انتونیو گوتریس کو خط لکھا کہ سفارتکاری کا دروازہ یقینی طور پر بند ہو چکا ہے، ایران پر امریکی حملے بین الاقوامی نظام کی تباہی اور مکمل ناکامی ہیں، عالمی ادارے کی عدم فعالیت سےبحران بڑھنے کا خدشہ ہے۔

انہوں نے یہ بھی لکھا کہ ایک ایٹمی ریاست کی جانب سے غیر ایٹمی ریاست پر یہ حملہ این پی ٹی قوانین کی کھلی خلاف ورزی ہے۔