پرو لیگ میں قومی ہاکی ٹیم کو شرکت کا مثبت اشارہ مل گیا

اسلام آباد:  پاکستان ہاکی فیڈریشن (پی ایچ ایف) کو پرو لیگ میں قومی ہاکی ٹیم کی شرکت کے لیے مثبت اشارہ مل گیا ۔

ذرائع کے مطابق وزارت بین الصوبائی رابطہ میں وزیراعظم کے مشیر رانا ثنا اللہ کی زیر صدارت اہم اجلاس ہوا، سیکریٹری پی ایچ ایف رانا مجاہد نے پرو لیگ کے حوالے سے بریفنگ دی۔

ذرائع نے بتایا کہ رانا مجاہد نے پرو لیگ میں قومی ٹیم کی شرکت سے پاکستان ہاکی پر اثرات سے آگاہ کیا۔

ذرائع کے مطابق پرو لیگ میں قومی ہاکی ٹیم کی شرکت کے لیے فیڈریشن اور ادارے متفق ہیں۔ پی ایچ ایف، پی ایس بی اور آئی پی سی وزارت متفق ہو گئے ہیں۔

ذرائع کا کہنا ہے کہ سیکریٹری پی ایچ ایف ایک دو روز میں ایڈیشنل سیکریٹری فنانس سے ملاقات کریں گے، فنانس کے معاملات طے ہونے پر پرولیگ میں شرکت کا باقاعدہ اعلان ہوگا۔