سیلفی کے دوران حفاظتی رسی کھولنے والا کوہ پیما کھائی میں جا گرا،ویڈیو وائرل

 

چین کے صوبہ سیچوان میں پہاڑ کی چوٹی پر سیلفی لینے کی کوشش ایک کوہ پیما کی جان لے گئی۔ 31 سالہ کوہ پیما ہانگ ناما پہاڑ کی چوٹی کے قریب خوفناک حادثے کا شکار ہوا، جس کی ویڈیو سوشل میڈیا پر وائرل ہو چکی ہے۔

رپورٹس کے مطابق ہانگ 25 ستمبر کو 5 ہزار 588 میٹر بلند پہاڑ سر کرنے والے ایک ہائیکنگ گروپ کے ساتھ شریک تھا۔ واقعے کے عینی شاہدین نے بتایا کہ ہانگ نے گروپ سیلفی لینے کے لیے اپنی حفاظتی رسی کھول دی، توازن بگڑنے پر وہ پھسلتا ہوا ڈھلوان کی طرف گیا اور تقریباً 200 میٹر نیچے گر کر موقع پر ہی ہلاک ہوگیا۔

عینی شاہدین کے مطابق حادثے کے وقت ہانگ نے برف پر چلنے والے کلہاڑے کا استعمال بھی نہیں کیا تھا، جس سے گرنے کا خدشہ بڑھ گیا۔
سوشل میڈیا پر وائرل ہونے والی ویڈیو میں واضح طور پر دیکھا جا سکتا ہے کہ کوہ پیما پہاڑ کے کنارے سے نیچے گرتا ہے اور چند ہی لمحوں میں نظروں سے اوجھل ہو جاتا ہے۔

حادثے کے بعد ریسکیو ٹیمیں فوری طور پر موقع پر پہنچیں، تاہم ہانگ کی موت کی تصدیق کردی گئی۔ بعد ازاں لاش کو گونگا ماؤنٹین ٹاؤن منتقل کیا گیا۔

ہانگ کے چچا زاد بھائی نے مقامی میڈیا کو بتایا کہ یہ اس کی پہلی کوہ پیمائی کی کوشش تھی، اور اس نے دوسروں کی تصاویر لینے کے لیے اپنی رسی کھولی تھی۔ ان کے مطابق امکان ہے کہ وہ اپنے ہی کرامپونز (برف پر چلنے والے جوتوں کے دھاتی کیل) پر ٹھوکر کھا کر گرا ہو۔

مقامی حکام کا کہنا ہے کہ ہانگ کے گروپ نے پہاڑ سر کرنے کی سرکاری اجازت نہیں لی تھی اور نہ ہی انتظامیہ کو پیشگی اطلاع دی گئی تھی۔
کانگڈنگ میونسپل ایجوکیشن اینڈ اسپورٹس بیورو کے مطابق گروپ نے بنیادی حفاظتی اصولوں کی خلاف ورزی کی۔ ایک اہلکار نے کہا کہ

"اگر حفاظتی رسی نہ کھولی جاتی اور کرامپونز برقرار رہتے تو شاید یہ حادثہ پیش نہ آتا۔”

واقعے نے چین میں کوہ پیمائی کے دوران سیلفی کلچر اور حفاظتی اصولوں کی خلاف ورزی پر نئی بحث چھیڑ دی ہے۔