ٹرمپ کا ملائیشیا جاتے ہوئے دوحہ میں مختصر قیام،امیرِ قطر سے جہاز میں ملاقات

دوحہ: امریکی صدر ڈونلڈ ٹرمپ نے ملائیشیا کے دورے پر جاتے ہوئے قطر میں مختصر قیام کیا، جہاں انہوں نے جہاز میں قطر کے امیر شیخ تمیم بن حمد الثانی اور وزیراعظم شیخ محمد بن عبدالرحمٰن الثانی سے ملاقات کی۔

غیر ملکی خبر رساں ادارے کے مطابق صدر ٹرمپ ملائیشیا میں منعقد ہونے والے آسیان (ASEAN) سربراہی اجلاس میں شرکت کے لیے روانہ تھے اور اس دوران انہوں نے دوحہ میں مختصر قیام کیا۔

ملاقات کے دوران صدر ٹرمپ نے کہا کہ امریکا نے مشرقِ وسطیٰ میں “ناقابلِ یقین امن” حاصل کیا ہے اور قطر نے اس عمل میں کلیدی کردار ادا کیا ہے۔

بعد ازاں طیارے میں صحافیوں سے گفتگو کرتے ہوئے امریکی صدر نے کہا کہ انہیں چینی صدر شی جن پنگ سے ملاقات کی امید ہے اور توقع ہے کہ چین مزید محصولات سے بچنے کے لیے تجارتی معاہدہ کرنے پر تیار ہو جائے گا۔

انہوں نے کہا کہ غزہ میں پائیدار امن قائم ہونا ضروری ہے، اس مقصد کے لیے جلد ٹاسک فورس تشکیل دی جائے گی، اور ضرورت پڑنے پر قطر غزہ میں امن فوج بھیجنے کو تیار ہے۔

ٹرمپ نے مزید کہا کہ حماس کو فوری طور پر یرغمالیوں کی لاشیں واپس کرنی چاہئیں، بصورتِ دیگر امن معاہدے میں شامل ممالک مشترکہ کارروائی کریں گے۔ انہوں نے بتایا کہ امریکا اگلے 48 گھنٹوں تک صورتحال پر گہری نظر رکھے گا۔

امریکی صدر کا یہ بھی کہنا تھا کہ وہ اپنے ایشیائی دورے کے دوران چین کے علاوہ جنوبی کوریا اور جاپان بھی جائیں گے، جبکہ وہ شمالی کوریا کے رہنما کم جونگ اُن سے ملاقات کے خواہاں ہیں۔