غزہ میں فلسطینیوں کے لیے خوراک و پانی کی شدید قلت،انروا کی وارننگ

اقوام متحدہ کے ادارے انروا نے کہا ہے کہ اسرائیل کی سخت پابندیوں کی وجہ سے فلسطینی پناہ گزین خوراک اور پانی کی شدید کمی کا سامنا کر رہے ہیں۔

ادارے کے مطابق غزہ میں تقریباً 2 لاکھ 50 ہزار بے گھر فلسطینیوں کو پانی فراہم کیا گیا ہے، تاہم ہزاروں خاندان اب بھی خوراک، پانی اور دیگر بنیادی ضروریات کے لیے شدید مشکلات کا سامنا کر رہے ہیں۔

انروا نے کہا کہ صاف پانی تک محفوظ رسائی ہر شہری کے لیے ناگزیر ہے، مگر اسرائیل نے انسانی امداد کی ترسیل پر سخت پابندیاں عائد کر رکھی ہیں۔

یاد رہے کہ اسرائیل اور حماس کے درمیان جنگ بندی معاہدہ ہو چکا ہے، تاہم اسرائیل کی جانب سے سرحدی گزرگاہیں بند کرنے اور غزہ میں مختلف علاقوں پر حملے جاری ہیں، جس سے امدادی کارروائیاں متاثر ہو رہی ہیں۔