پی ایس ایل ٹیم مالکان کا مطالبہ منظور، بورڈ کا ہنگامی اجلاس آج نیشنل کرکٹ اکیڈمی میں طلب

لاہور: پاکستان کرکٹ بورڈ (پی سی بی) نے پاکستان سپر لیگ (پی ایس ایل) ٹیم مالکان کے مطالبے پر ہنگامی اجلاس آج نیشنل کرکٹ اکیڈمی میں طلب کر لیا۔

ذرائع کے مطابق پی ایس ایل فرنچائز مالکان نے انتظامیہ سے ملاقات کے دوران 2026 اور 2027 سیزنز سے متعلق تحفظات کا اظہار کیا تھا، جن پر آج اجلاس میں تفصیلی غور کیا جائے گا۔ اجلاس میں تمام چھ فرنچائزز بشمول ملتان سلطانز کے نمائندے شریک ہوں گے۔

فرنچائز مالکان نے کمرشل امور، ایونٹ ونڈو، ای وائی ایویلیوایشن رپورٹ اور ٹائٹل اسپانسرشپ معاہدے کے طریقہ کار پر بھی بریفنگ کا مطالبہ کیا ہے۔

ذرائع کے مطابق پی سی بی نے پی ایس ایل میں دو نئی ٹیمیں شامل کرنے کا فیصلہ کر لیا ہے۔ لیگ کے 10 سال مکمل ہونے پر رواں ماہ فرنچائزز کے ساتھ نیا معاہدہ کیا جائے گا۔

پی ایس ایل کے چیف ایگزیکٹو آفیسر سلمان نصیر کا کہنا ہے کہ آئندہ سیزن میں لیگ کے میچز کا دائرہ کار لاہور، کراچی، راولپنڈی اور ملتان کے علاوہ فیصل آباد اور پشاور تک بڑھایا جا رہا ہے۔

انہوں نے مزید کہا کہ پی ایس ایل کی نئی ٹیم کے لیے نومبر میں ٹینڈر جاری کیے جائیں گے، جس میں دلچسپی رکھنے والے مختلف شہروں کے ناموں میں سے اپنی مرضی کے نام کا انتخاب کر سکیں گے۔