ڈنمارک ،15 سال سے کم عمر بچے سوشل میڈیا استعمال نہیں کر سکیں گے

کپن ہیگن: ڈنمارک کی حکومت نے 15 سال سے کم عمر بچوں کے لیے سوشل میڈیا کے استعمال پر پابندی عائد کرنے کا اعلان کیا ہے۔ حکومت کے مطابق اس اقدام کا مقصد کم عمر بچوں کو آن لائن خطرات، نفسیاتی دباؤ اور غیر مناسب مواد سے محفوظ رکھنا ہے۔

سرکاری اعلامیے کے مطابق 13 سال تک کے بچوں کو صرف چند مخصوص اور نگرانی شدہ پلیٹ فارمز تک رسائی کی اجازت ہوگی، جبکہ دیگر تمام سوشل میڈیا ایپس کے استعمال پر مکمل پابندی ہوگی۔

حکومتی ترجمان نے بتایا کہ پارلیمان کی اکثریت نے اس منصوبے کی حمایت کا اعلان کر دیا ہے اور آئندہ دنوں میں اس پر رسمی ووٹنگ متوقع ہے۔ والدین اور تعلیمی ادارے بھی بچوں کے ڈیجیٹل استعمال کی نگرانی میں حکومت کے ساتھ تعاون کریں گے تاکہ ایک محفوظ آن لائن ماحول فراہم کیا جا سکے۔