غزہ: کلینک کے ملبے سے 35 لاشیں برآمد، مزید 3 فلسطینی شہید

غزہ: اسرائیلی فوج کی کارروائیوں میں مزید 3 فلسطینی شہید ہو گئے ہیں، جبکہ غزہ شہر میں ایک کلینک کے ملبے سے 35 ناقابل شناخت لاشیں برآمد ہوئی ہیں۔

غزہ کی وزارت صحت کے مطابق اسرائیلی فوج نے جنگ بندی کی خلاف ورزی کرتے ہوئے شہری علاقوں پر حملے جاری رکھے، جس کے نتیجے میں مزید افراد جان سے ہاتھ دھو بیٹھے۔

غیر ملکی خبر رساں ادارے کے مطابق امریکی صدر کی منظوری سے گزشتہ ماہ نافذ شدہ جنگ بندی کے باوجود اسرائیلی حملے رکنے کا نام نہیں لے رہے۔

غزہ کے شہری دفاع کے مطابق کلینک کے ملبے سے برآمد شدہ 35 لاشیں ناقابل شناخت ہیں اور ان کی شناخت کے لیے مزید کارروائی جاری ہے۔

واضح رہے کہ اسرائیل کی 2 سال سے زائد جاری کارروائیوں میں اب تک 69 ہزار سے زائد فلسطینی شہید اور ایک لاکھ 20 ہزار سے زائد زخمی ہو چکے ہیں۔

فلسطینی مزاحمتی تنظیم حماس کے بیان کے مطابق اسرائیلی فوج زیادہ تر رہائشی عمارتوں اور عام شہریوں کو نشانہ بنا رہی ہے اور دو منزلہ عمارتوں کو بھی ڈھونڈ ڈھونڈ کر نشانہ بنایا جا رہا ہے۔