قومی کرکٹرز کو مختلف لیگز میں شرکت کے لیے این او سی جاری

لاہور: قومی کرکٹرز کو مختلف لیگز میں شرکت کے لیے این او سی جاری کر دیے گئے ہیں۔ ذرائع کے مطابق قومی کھلاڑی ابوظبی میں ٹی 10 لیگ اور دبئی کی آئی ایل ٹی ٹوئنٹی لیگ میں حصہ لے سکیں گے۔

ابوظبی لیگ کے لیے این او سی 25 نومبر تک اور دبئی کی ٹی ٹوئنٹی لیگ کے لیے 2 دسمبر سے 4 جنوری تک جاری کیے گئے ہیں۔ دبئی کی لیگ میں فخر زمان، حسن نواز اور نسیم شاہ شامل ہوں گے، جبکہ ابوظبی لیگ کے لیے افتخار احمد، خواجہ نافع، آصف علی، سلمان ارشاد، محمد عامر، عرفات منہاس، عرفان خان، اعظم خان، شاہنواز دہانی، عباس آفریدی، عاکف جاوید، میر حمزہ، عبید شاہ اور زمان خان کو این او سی دیا گیا ہے۔

واضح رہے کہ بابر اعظم، محمد رضوان، شاہین آفریدی، شاداب خان، حارث رؤف اور حسن علی پہلے ہی بگ بیش لیگ (بی بی ایل) کے لیے این او سی حاصل کر چکے ہیں۔