انڈیا میں فلائٹ آپریشنز مفلوج،کرکٹرز پھنس گئے

 

انڈیا میں فلائٹ آپریشنز کے متاثر ہونے کی وجہ سے انڈر 16 اور انڈر 19 کرکٹرز اپنے ٹورنامنٹس میں شرکت کے لیے روانہ نہیں ہو سکے۔ انڈر 19 کوچ بہار اور وجے مرچنٹ ٹرافی میں حصہ لینے والی ٹیمیں خاص طور پر متاثر ہوئیں۔

بھارتی میڈیا کے مطابق فلائٹس منسوخ ہونے کی وجہ سے ڈومیسٹک ایج گروپ کرکٹرز ائیرپورٹس پر پھنس گئے ہیں، جبکہ ٹورنامنٹس ملک کے مختلف وینیوز پر پیر سے شروع ہو رہے ہیں۔ اس صورتحال کے باعث ریاستی ٹیموں کو اپنے وینیوز پر پہنچنے میں مشکلات کا سامنا ہے۔

کچھ ریاستوں کی کرکٹ ایسوسی ایشنز نے ٹیموں کو وینیوز تک بسوں کے ذریعے بھیجنے کا انتظام کیا۔ خاص طور پر بنگال اور مقبوضہ کشمیر کی ٹیمیں بسوں کے ذریعے روانہ کی گئی ہیں۔

صدر بھارتی کرکٹ بورڈ متھن منہاس نے کہا کہ یہ ایک مشکل وقت ہے اور کسی کے کنٹرول میں نہیں۔ اگر ریاستی ٹیمیں تاخیر سے وینیوز پر پہنچتی ہیں تو میچز ایک دن تاخیر سے شروع ہو سکتے ہیں۔ ٹیموں کے پہنچنے کے بعد میچ آفیشلز آئندہ لائحہ عمل کا فیصلہ کریں گے۔