غزہ:اسرائیل کی جنگ بندی کی خلاف ورزی،مزید 6 فلسطینی شہید

غزہ میں اسرائیلی فوج کی جنگ بندی کی خلاف ورزیاں جاری ہیں اور تازہ حملے میں 6 فلسطینی شہید ہو گئے۔ الجزیرہ کے مطابق جمعہ کو اسرائیل نے غزہ کے مشرقی علاقے تفاح میں واقع ایک اسکول کو نشانہ بنایا، جہاں فلسطینی پناہ لیے ہوئے تھے۔

اسرائیلی حملے میں بچوں سمیت متعدد افراد زخمی بھی ہوئے۔ یہ حملہ جنگ بندی معاہدے کی تازہ ترین خلاف ورزی قرار دیا جا رہا ہے۔

دوسری جانب اسرائیلی فوجیوں نے مقبوضہ مغربی کنارے کے مختلف علاقوں میں چھاپے مارے، جن میں متعدد فلسطینی زخمی اور گرفتار بھی ہوئے۔

رپورٹس کے مطابق اسرائیلی جنگ میں غزہ میں اکتوبر 2023 سے اب تک کم از کم 70 ہزار سے زائد فلسطینی شہید ہو چکے ہیں۔