راولپنڈی ڈویژن میں سپرفلو کے 4 کیسزکی تصدیق ۔علاج سے تمام صحت یاب

راولپنڈی ڈویژن میں سپرفلو کے 4 کیسزکی تصدیق ہوئی ہے۔ ضلعی صحت حکام کے مطابق دسمبر میں انفلوئنزا اے (H3) جسے عام طور پر سپر فلوکہا جاتاہے، سے متاثرہ ،سانس کی شدید بیماری میں مبتلا 22 مشتبہ کیسزکی اسکریننگ کی گئی جن میں سے 4 مثبت آئے۔

محکمہ صحت کے مطابق راولپنڈی ضلع سے سپرفلو کے تین کیسز رپورٹ ہوئے تھے، جو سیٹلائٹ ٹاؤن، یونین کونسل 39، اور ریلوے کالونی سے تعلق رکھتے ہیں، ایک کیس مری سے رپورٹ ہوا۔محکمہ صحت کے ریپڈ رسپانس پروٹوکول کے تحت 18 قریبی رابطوں کی ٹریسنگ کی گئی، جن میں سے صرف ایک ثانوی کیس مثبت آیا، جو اس بات کی واضح نشاندہی کرتا ہے کہ بیماری کا پھیلاؤ محدود ہے۔ نشاندہی شدہ علاقوں میں فعال نگرانی کا عمل جاری ہے۔

مزید پڑھیں: انفلوائنزا کی تبدیل شدہ قسم تیزی سے پھیلنے لگی،پاکستان میں بھی ایڈوائزری جاری

حکام نے کہا کہ کڑی نگرانی برقرار رکھی ہوئی ہے۔ اس مقصد کے لیے شدید نوعیت کی سانس کی بیماریوں (SARI) اور انفلوئنزا سے مشابہ علامات (ILI) کے کیسز کی مسلسل اور سخت مانیٹرنگ کی جا رہی ہے۔ موجودہ وبائی اعداد و شمار کے مطابق صورتحال مکمل طور پر قابو میں ہے۔ عوام سے گزارش ہے کہ گھبرانے کی ضرورت نہیں، معمول کی صفائی، ہاتھ دھونے، اور سانس سے متعلق احتیاطی تدابیر اختیار کریں، کیونکہ مجموعی طور پر صورتحال مکمل طور پر کنٹرول میں ہے۔