امریکا میں بڑا کریک ڈاؤن، ایک لاکھ سے زائد ویزے منسوخ

واشنگٹن: امریکا نے ویزا قوانین کی خلاف ورزی کرنے والے افراد کے خلاف بڑی کارروائی کرتے ہوئے ایک لاکھ سے زائد ویزے منسوخ کر دیے ہیں۔ اس میں ہزاروں غیر ملکی طلبہ اور روزگار کے لیے امریکا آنے والے افراد شامل ہیں۔

امریکی محکمہ خارجہ کے مطابق یہ کارروائی صدر ڈونلڈ ٹرمپ کے دور صدارت کے پہلے سال میں کی گئی۔ منسوخ کیے گئے ویزوں میں کاروبار اور سیاحت کے ویزے رکھنے والے وہ افراد بھی شامل تھے جو مقررہ مدت ختم ہونے کے باوجود امریکا میں قیام پذیر رہے۔

محکمہ خارجہ کے مطابق جن افراد کے ویزے منسوخ کیے گئے ان میں 8 ہزار طلبہ اور 2 ہزار 500 روزگار کے لیے آنے والے افراد شامل ہیں۔ زیادہ تر کیسز میں مجرمانہ ریکارڈ یا قانونی خلاف ورزیوں کے شواہد موجود تھے۔

بیان میں کہا گیا کہ شراب نوشی کے دوران گاڑی چلانا، تشدد، چوری، بچوں کے ساتھ بدسلوکی، منشیات کی تقسیم اور مالی بدعنوانی جیسے الزامات کی بنیاد پر بھی ویزے منسوخ کیے گئے۔

امریکی محکمہ خارجہ نے واضح کیا ہے کہ ملک کو محفوظ بنانے کے لیے ویزا منسوخی اور ملک بدری کی کارروائیاں آئندہ بھی جاری رکھی جائیں گی۔

واضح رہے کہ گزشتہ سال اگست میں ٹرمپ انتظامیہ نے 55 ملین ویزا ہولڈرز کے ریکارڈ کا ازسرِنو جائزہ لینے کا اعلان کیا تھا۔