قطر کے العدید بیس پرامریکی جنگی طیاروں کی سرگرمیاں تیز

 دوحہ: امریکی صدر ڈونلڈ ٹرمپ کی ایران پر ممکنہ حملے کی دھمکیوں کے بعد امریکی جنگی طیاروں کی قطر کے العدید ایئر بیس پر سرگرمیاں بڑھ گئی ہیں۔

میڈیا رپورٹس کے مطابق اتوار کی رات کئی امریکی جنگی طیاروں نے پروازیں کیں، جن میں کے سی 135 ایئر ریفیولنگ ٹینکر اور بی 52 اسٹریٹیجک بمبار طیارے شامل تھے۔ قطر کا العدید بیس ایرانی سرحد سے تقریباً 200 سے 300 کلومیٹر کے فاصلے پر واقع ہے۔

دریں اثنا امریکا نے اپنے شہریوں کو ایران چھوڑنے کی ہدایت بھی جاری کی ہے۔ ایران میں امریکی ورچوئل سفارت خانے نے شہریوں کو خبردار کیا ہے کہ ملک میں احتجاج شدت اختیار کر رہے ہیں اور تشدد میں بدل سکتے ہیں۔

سفارت خانے نے کہا کہ ممکن ہو تو زمینی راستے سے آرمینیا یا ترکیہ کے ذریعے ایران چھوڑیں اور ایسے انتظامات کریں جن میں امریکی حکومت کی مدد پر انحصار نہ ہو۔