ڈی جی خان،مردڈینسٹ کے گائنی آپریشن سے زچہ چل بسی۔’’ڈاکٹر‘‘خودبھی بے ہوش

 

ڈیرہ غازی خان میں مرد ڈینسٹ کے گائنی آپریشن سے مریضہ دم توڑگئی۔ ’’ ڈاکٹر‘‘ خودبھی بے ہوش ہوکرگرپڑا۔صحت حکام نے نجی ہسپتال کو فوری طورپر سیل کردیا۔

ڈی جی خان کے ایک نجی ہسپتال میں خاتون سرجن کے بجائے دندان سازنے زچگی کا آپریشن کردیاجس میں پیچیدگی کی وجہ سے زچہ چل بسی۔ نجی ٹی وی کے مطابق، ’’ ڈاکٹر‘‘ خودبھی خون دیکھ کر بے ہوش ہوگیا۔

ورثا کا کہنا ہے کہ آپریشن کے دوران خون زیادہ دہ بہنے پر آپریشن کرنے والا نا تجربہ کار ڈاکٹر بھی بیہوش ہوکر گرگیا، ہم نے بے ہوش ڈاکٹرکو کیبن میں پہنچایا۔ورثا کے مطابق ہم لیڈی ڈاکٹر کو بلاتے رہے مگر وہ مریضہ کی حالت تشویشناک ہونے پربھی نہ پہنچی۔

مزید پڑھیں:پاکستان میں زچگی کی غیرضروری سرجری پیسہ کمانے کا ذریعہ بن گئی

 

اہل خانہ کے احتجاج کے بعد ہیلتھ کئیر کمیشن اور ڈسٹرکٹ ہیلتھ اتھارٹی کی ٹیمیں نجی ہسپتال پہنچ گئیں جس پر ہسپتال انتظامیہ نے ریکارڈ دینے سے انکار کیا اور مبینہ طور پر سی سی ٹی وی کیمرے کی ڈیوائس بھی تبدیل کردی۔

ڈسٹرکٹ ہیلتھ آفیسر نے عدم تعاون پر ہسپتال کو فوری طورپر سیل کرکے مزید تحقیقات شروع کردیں اور ورثا کو انصاف کی یقین دہانی کرائی۔ ڈی ایچ او نے کہا کہ واقعے کی تحقیقات کیلیے ٹیمیں تشکیل دے دی گئی ہیں۔ دوسری جانب وفاقی وزیرِ مملکت و معاون خصوصی وزیراعظم حذیفہ رحمان نے دورانِ زچگی خاتون کی ہلاکت کا سختی سے نوٹس لیتے ہوئے رپورٹ طلب کرلی۔