سرگودھا کارڈیالوجی سے میانوالی کے مریض بھی مستفید ہوں گے:مریم نواز

وزیراعلیٰ پنجاب مریم نواز شریف نے کہا ہے کہ سرگودھا کارڈیالوجی سے ضلع میانوالی کے امراض قلب کے مریض بھی مستفید ہو سکیں گے۔

یہ اعلان میانوالی کے ارکان قومی و صوبائی اسمبلی کے وفد سے ملاقات کے دوران کیا گیا، جس میں علی حیدر نور خان، عبید اللہ خان شادخیل، امانت اللہ خان شادخیل، عدیل عبد اللہ خان رخڑی، ملک فیروز جوئیہ اور ملک سجاد خان بھچڑ شامل تھے۔ ملاقات میں ملکی سیاسی صورتحال، پنجاب میں جاری ترقیاتی منصوبے اور امن و امان پر تفصیلی گفتگو ہوئی۔

وفد نے وزیراعلیٰ مریم نواز شریف کو اعزازیہ کارڈ برائے امام مسجد دینے پر خراج تحسین پیش کیا اور صوبے کے تمام سرکاری ہسپتالوں میں مفت ادویات کی فراہمی کو سراہا۔

وزیراعلیٰ پنجاب نے کہا کہ تاریخ میں پہلی بار پسماندہ اور چھوٹے اضلاع سے ہر بڑے پراجیکٹ کا آغاز کیا جا رہا ہے اور عوامی خدمت کے سفر کو مزید تیزی سے آگے بڑھایا جائے گا۔ انہوں نے ستھرا پنجاب پروگرام کو دنیا کا سب سے بڑا ویسٹ مینجمنٹ پروگرام قرار دیا۔

وفد نے میانوالی میں پہلی پبلک ٹرانسپورٹ الیکٹروبس کے تحفے پر وزیراعلیٰ کو اظہار تشکر کیا اور کہا کہ میانوالی میں بیوٹیفکیشن اور ستھرا پنجاب پراجیکٹ سے شہر کی خوبصورتی میں نمایاں اضافہ ہوا ہے۔