لاہور میں بسنت کے دوران مفت ٹرانسپورٹ کا پلان فائنل

 

حکومت پنجاب نے لاہور میں بسنت کے دوران مفت ٹرانسپورٹ کا پلان فائنل کر لیا ہے۔ کمشنر لاہور ڈویژن نے ٹرانسپورٹ پلان کی منظوری دے دی ہے جس کے تحت شہری میٹرو بس اور اورنج لائن ٹرین سے مفت سفر کر سکیں گے۔

پلان کے مطابق پنجاب ماس ٹرانزٹ اتھارٹی، پنجاب ٹرانسپورٹ کمپنی اور نجی رائیڈر کمپنیاں شہریوں کو مفت ٹرانسپورٹ فراہم کریں گی۔ علاوہ ازیں، سرکاری کالجز اور یونیورسٹیز سے بھی بسنت کے لیے بسیں حاصل کر لی گئی ہیں۔

لاہور کے 24 روٹس پر مفت ٹرانسپورٹ کی سہولت فراہم کی جائے گی، جن میں 228 فیڈر بسیں، میٹرو بس سروس کی 64 بسیں، 54 بسیں سرکاری کالجز سے اور 73 بسیں یونیورسٹیز سے شامل ہیں۔ اورنج لائن میٹرو ٹرین سے یومیہ تقریبا اڑھائی لاکھ افراد سفر کر سکیں گے، جبکہ میٹرو بس سے گجومتہ تا شاہدرہ 87 ہزار افراد کو مفت ٹرانسپورٹ کی سہولت ملے گی۔ فیڈر روٹس کے ذریعے یومیہ ایک لاکھ 27 ہزار افراد کو مفت ٹرانسپورٹ فراہم کی جائے گی۔

مزید تفصیلات کے مطابق مختلف روٹس پر بسوں کی تعداد درج ذیل ہوگی:

• رانا ٹاؤن تا ریلوے اسٹیشن: 13 بسیں
• آر اے بازار تا چونگی: 4 بسیں
• بھٹی چوک تا شاد باغ: 5 بسیں
• ڈپو چوک تا چونگی: 4 بسیں
• کنال تا جناح ٹرمینل: 12 بسیں
• ریلوے اسٹیشن تا گلشن راوی: 8 بسیں
• وحدت روڈ تا قرطبہ چوک: 11 بسیں
• آر اے بازار تا ناصر باغ: 13 بسیں
• پرانا کاہنہ تا آر اے بازار: 19 بسیں
• بھٹی چوک تا آر اے بازار: 19 بسیں
• جناح بس ٹرمینل تا بی آر بی: 17 بسیں

مجموعی طور پر بسوں کے ذریعے یومیہ 5 لاکھ 16 ہزار افراد کو مفت ٹرانسپورٹ فراہم کی جائے گی، جبکہ نجی کمپنی کے 5 ہزار رکشوں کو برانڈنگ کر کے بسنت کے دوران مفت ٹرانسپورٹ کے لیے استعمال کیا جائے گا۔