بلوچستان کے تبری-1 کنویں میں گیس کی کامیاب دریافت

کوئٹہ: بلوچستان کے ضلع ڈیرہ بگٹی میں کلچس ساؤتھ بلاک کے تبری-1 کنویں میں گیس کی کامیاب دریافت کے باضابطہ اعلان کے بعد ملکی توانائی کے شعبے میں نمایاں پیش رفت ہوئی ہے۔

یہ کنواں کلچس ساؤتھ بلاک میں پہلا کامیاب کنواں ہے اور قومی سطح پر گیس کی پیداوار میں اضافے کے لیے حوصلہ افزا سنگِ میل ثابت ہو رہا ہے۔ تبری-1 کنواں گزشتہ برس کھودا گیا اور اسے 7,170 فٹ کی گہرائی تک ڈرل کیا گیا۔

ابتدائی ٹیسٹنگ کے نتائج کے مطابق کنویں سے یومیہ 11 ایم ایم ایس سی ایف ڈی تک گیس کا بہاؤ ریکارڈ کیا گیا ہے، جبکہ کنویں کی مکمل پیداواری صلاحیت جانچنے کے لیے مزید ٹیسٹنگ اور تجزیاتی عمل جاری ہے۔

یہ دریافت مقامی گیس پیداوار میں اضافہ، درآمدی انحصار میں کمی اور قومی توانائی تحفظ کو مضبوط بنانے میں اہم کردار ادا کرے گی۔ اس منصوبے میں یونائیٹڈ انرجی پاکستان لمیٹڈ بطور آپریٹر شامل ہے، جبکہ ماری انرجیز لمیٹڈ اور دیوان پیٹرولیم بھی جوائنٹ وینچر کا حصہ ہیں۔

ایس آئی ایف سی کے اصلاحاتی وژن کے تحت بلوچستان میں توانائی کی یہ پیش رفت پاکستان کے ہائیڈرو کاربن وسائل کو مؤثر انداز میں بروئے کار لانے اور مقامی توانائی صلاحیت میں اضافے کے عزم کی عکاس ہے۔ یہ دریافت ملکی توانائی تحفظ، صنعتی ترقی اور معاشی استحکام کی جانب ایک مثبت قدم ہے۔