بنگلا دیش کے عبوری سربراہ محمد یونس مستعفی

بنگلا دیش کے عبوری سربراہ اور نوبیل امن انعام یافتہ رہنما محمد یونس نے اپنے عہدے سے مستعفی ہونے کا اعلان کر دیا اور اقتدار نئی منتخب قیادت کے حوالے کر دیا۔

محمد یونس نے قوم سے الوداعی خطاب میں کہا کہ جمہوریت، آزادیٔ اظہار اور بنیادی حقوق کا سفر جاری رہنا چاہیے۔ 85 سالہ رہنما نے کہا کہ عبوری حکومت اپنی ذمہ داریاں مکمل کر رہی ہے اور عوام کے فیصلے کا احترام کرتے ہوئے اقتدار نئی منتخب قیادت کو منتقل کیا جا رہا ہے۔

محمد یونس اگست 2024 میں وطن واپس آئے تھے، جب سابق وزیرِ اعظم شیخ حسینہ کی حکومت طلبہ کی قیادت میں ہونے والی عوامی تحریک کے نتیجے میں ختم ہو گئی تھی۔ انہوں نے اپنے خطاب میں نوجوانوں کی کوششوں کو سراہتے ہوئے اس دن کو “عظیم آزادی کا دن” قرار دیا۔

گزشتہ ہفتے ہونے والے عام انتخابات میں بی این پی نے بھاری اکثریت سے کامیابی حاصل کی، اور پارٹی کے سربراہ طارق آج وزیرِ اعظم کے عہدے کا حلف اٹھائیں گے۔ محمد یونس نے انتخابات کو شفاف قرار دیا اور کہا کہ عوام، سیاسی جماعتوں اور متعلقہ اداروں نے جمہوری عمل کو مضبوط بنانے میں اہم کردار ادا کیا۔